وزیراعلیٰ خیبرپختونخواہ کی جانب سے افغانستان میں زلزلے سے متاثرہ عوام کے لئے میڈیکل ٹیمیں بھیجنے کا فیصلہ کیا گیا ہے۔

تفصیلات کے مطابق افغانستان کے صوبے پکتیکا میں زلزلے کے باعث بڑی تعداد میں جانی اور مالی نقصان ہوا ہے جس کی پیش نظر وزیراعلیٰ خیبرپختونخواہ محمود خان نے امدادی سرگرمیوں کے لئے فوری طور پر میڈیکل ٹیم سمیت امدادی سامان بھیجنے کا فیصلہ کیا ہے۔

امدادی سامان میں ادویات،  اشیائے خوردونوش اور دیگر ضروری چیزیں شامل ہونگی۔

وزیراعلیٰ نے اس سلسلے میں فوری اقدامات کے لئے وزیر صحت اور چیف سیکرٹری کو ہدایات بھی جاری کردی ہیں ۔

اس حوالے سے محمود خان کا کہنا ہے کہ خیبر پختونخوا حکومت مشکل کی اس گھڑی میں اپنے افعان بھائی بہنوں کے ساتھ کھڑی ہے اور ہر ممکن مدد فراہم کرے گی۔

انہوں نے کہا کہ صوبائی حکومت کی جانب سے اس مقصد کیلئے ہر ممکن وسائل فراہم کیے جائینگے۔

علاوہ ازیں وزیراعلیٰ محمود خان افغانستان میں زلزلے سے ہونے والی جانی و مالی نقصانات پر اظہار افسوس کرتے ہوئے متاثرہ خاندانوں سے دلی ہمدردی کا اظہار کیا ہے۔

خیال رہے کہ افغانستان میں زلزلے کے حوالے سے حکام کا کہنا ہے کہ افغانستان میں گزشتہ رات آئے زلزلے سے اموات 950 ہوگئیں ہیں جبکہ رات 6.1 شدت کے زلزلے کے باعث مختلف واقعات میں 610 افراد زخمی ہیں۔