کراچی: جمعتہ المبارک کے موقع پر مرکزی مساجد اور دیگر کھلے مقامات پر سیکیورٹی ہائی الرٹ کردی گئی ہے۔

اس حوالے سے آئی جی سندھ غلام نبی میمن نے کہا ہے کہ جمعتہ المبارک کے موقع پر مرکزی مساجد، امام بارگاہوں ودیگر کھلے مقامات پر انتہائی الرٹ سیکیورٹی اقدامات کو یقینی بنایا جائے۔

غلام نبی میمن نے کہا کہ نماز جمعہ کے تمام اجتماعات کے موقع پر شہریوں کے تحظ کے لئے تھانہ جات کی سطح پر مربوط اور مؤثر اقدامات کو یقینی بنایا جائے۔

انہوں نے کہا کہ تمام ایس ایچ اوز علاقوں میں اپنی موجودگی کے تحت پیٹرولنگ،اسنیپ چیکنگ، پکٹنگ کے عمل کو مذید سخت بنائیں۔

آئی جی سندھ کا کہنا ہے کہ تمام حساس واہم تنصیبات، پبلک مقامات، سرکاری ونجی اہم عمارتوں، وغیرہ پر سیکیورٹی ہائی الرٹ رکھی جائے، داخلی وخارجی راستوں پر نگرانی وناکہ بندی کے تحت سرچنگ کے عمل کو مربوط اور مؤثر بنایا جائے۔

غلام نبی میمن نے کہا کہ ایڈوانس انٹیلی جینس کلیکشن و شیئرنگ کے عمل کوتھانوں کی سطح پر مزید مضبوط اور غیرمعمولی بنایا جائے۔

آئی جی سندھ غلام نبی میمن نے مزید کہا کہ سیکیورٹی اقدامات پر عمل درآمد کے حوالے سے کوئی بھی لاپروائی ناقابل برداشت ہوگی۔