وفاقی حکومت کی جانب سے ملک بھر ميں معاشی ايمرجنسی لگانے کا فيصلہ کیا گیا ہے۔

 تفصیلات کے مطابق ملک بھر میں بڑھتی ہوئی مہنگائی کی پیش نظر وزيراعظم کو حکومتی سطح پر اخراجات کم کرنے کی تجاويز بھجوا دی گئيں ہیں۔

وزیراعظم کو بھیجی جانے والی تجاویز میں سرکاری سطح پر فری پیٹرول ميں 30 سے 40 فيصد کٹوتی شامل ہے۔

اسکے علاوہ سرکاری سطح پر غير ضروری اخراجات کم کرنے کی تجويز بھی دی گئی ہے۔

خیال رہے کہ ملک میں معاشی ایمرجنسی کے حوالے سے تمام اقدامات کا اعلان وزيراعظم خود کريں گے۔

اس سے قبل وزیر اعلیٰ خیبر پختونخوا محمود خان نے سرکاری اداروں میں پیٹرول کی استعمال پر 35 فیصد کٹ لگایا ہے جبکہ  سندھ حکومت نے بھی تمام افسران کے پیٹرول کوٹے میں 40 فیصد کم کرنے کے احکامات دے دیئے ہیں۔

فیصلے کا اطلاق سرکاری اداروں، انسٹی ٹیوشنز اور آرگنائزیشن پر ہوگا۔

واضح رہے کہ امپورٹڈ حکومت نے ایک ہفتے میں دوسری بار پیٹرولیم مصنوعات کی قیمت میں 30 روپے فی لیٹر اضافہ کیا جس کے بعد پیٹرول کی نئی  قیمت 209 روپے 86 پیسے ہوگئی جب کہ ڈیزل 204 روپے 15 پیسے ، لائٹ ڈیزل 178 روپے 03 پیسے اور مٹی کا تیل 181روپے  94 پیسے لیٹر ہوگیا۔