پاکستان شوبز انڈسٹری کی نامور اداکارہ ریشم نے وفاقی بجٹ کو عوام اور فنکار دوست بجٹ قرار دیتے ہوئے وزیراعظم کا شکریہ بھی ادا کیا ہے۔

اداکارہ ریشم نے اپنے حالیہ ایک وڈیو پیغام میں کہا ہے کہ حکومت پاکستان نے فلم کو انڈسٹری کا درجہ دے کر بد حال انڈسٹری میں روح پھونک دی ہے۔

انہوں نے یہ بھی کہا کہ فنکاروں کی انشورنس بہت ہی اچھا قدم ہےایسے اقدامات سے بہت زیادہ خوشحالی آئیگی اور فنکاروں کی حالت بھی بہتر ہوگی۔

ریشم کا مزید کہنا ہےکہ یہ جو اعلانات کئے گئے ہیں اس سے سینما اور فلم انڈسٹری ترقی کرے گی۔ میں دل کی گہرائیوں سے وزیراعظم میاں محمد شہباز شریف کا شکریہ ادا کرتی ہوں۔

واضح رہے کہ اس سے قبل بھی ریشم نے انسٹاگرام پر ملکی سیاسی صورتحال پر اپنا ردعمل دیتے ہوئے ایک ویڈیو اپ لوڈ کی تھی، جس کے کیپشن میں انہوں نے لکھا کہ پوری قوم کو ڈھیروں مبارک ،ایک باب ختم ہوا۔۔۔امید ہے یہ نیا باب سُنہرا اور تابناک ہوگا۔

فلم اسٹار ریشم کا اپنی شئیر کردہ ویڈیو میں کہنا تھا کہ میرے بہت سے ساتھی فنکاروں نے بہت سی ویڈیوز بنائی بہت سارے نعرے لگائے اور اب وقت نے مجھے مجبور کیا ہے کہ میں بھی دل کی گہرائیوں سے ایک نعرہ ضرور لگاؤ، اور وہ نعرہ یہ ہے کہ شہباز شریف زندہ باد ، پاکستان زندہ باد۔