پاکستان اسٹاک ایکسچینج میں کاروباری ہفتے کے چوتھے روز انڈیکس میں مثبت رجحان ریکارڈ کیا گیا ہے۔

تفصیلات کے مطابق پاکستان اسٹاک ایکسچینج میں کاروباری ہفتے کے چوتھے روز انڈیکس میں زبردست تیزی رہی، مارکیٹ 258 پوائنٹس کے اضافے سے 42ہزار761 پربند ہوئی۔

دن بھرمجموعی طورپر358 کمپنیوں کے شیئرز میں کاروبار ہوا جن میں 236 کمپنیوں کے شیئرز کی قیمتوں میں اضافہ ہوا جبکہ صرف 96 کمپنیوں کے شیئرز میں کمی ہوئی۔

 آج مارکیٹ کی بلند ترین سطح 42,983 جبکہ کم ترین سطح 42,458 رہی۔

دوسری جانب انٹربینک میں ڈالر کی اونچی اُڑان تھم گئی آج کاروباری ہفتے کے چوتھے روز ڈالر کی قدر میں ریکارڈ کمی دیکھی جارہی ہے۔

انٹر بینک میں دن کے آغاز سے ہی ڈالر کی بے قدری کا سلسلہ جاری ہے اور روپے کی پوزیشن مستحکم ہوئی ہے جس کے سبب صبح کے وقت ڈالر 206 روپے 50 پیسے کی سطح پر موجود تھا۔

تاہم اب اسٹیٹ بینک آف پاکستان کی جانب سے جاری کردہ اعداد و شمار کے مطابق انٹربینک میں ڈالر کی قدر میں 4 روپے 70 پیسے کی کمی ہوئی جس کے بعد اب انٹر بینک میں ڈالر 207 روپے 23 پیسے پر بند ہوا ہے، اس کے علاوہ گزشتہ روز 22 جون کو ڈالر 211 روپے 93پیسے پر بند ہوا تھا۔

علاوہ ازیں اوپن مارکیٹ میں بھی ڈالر کی قیمت میں 4 روپے کی کمی ریکارڈ کی گئی، اوپن مارکیٹ میں ڈالر 209 روپے پر ٹریڈ ہو  رہا ہے، دو دن کے دوران اوپن مارکیٹ میں ڈالرکی قیمت ساڑھے6 روپےکم ہوئی ہے۔