شیخ رشید نے کہا ہے کہ ملک کسی حادثے کا شکار ہونے جا رہا ہے۔

سابق وزیر داخلہ شیخ رشید نے کہا ہے کہ معیشت ڈوب گئی، ڈالر208 روپے کا ہو گیا، افغانستان کی معیشت ہم سے بہتر ہو چکی، ملک کسی حادثے کا شکار ہونے جا رہا ہے۔

انہوں نے کہا کہ رانا ثناء جیسے بےوقوف کام کو مزید آسان بنا دیں گے، راناثناءاللہ ذہنی طور پر پاگل ہو چکے ہیں، 22 لوگوں کے قاتل ہیں، ہم احتجاج اور دھرنا کرنے نہیں جا رہے، جلسہ کر رہے ہیں۔

  واضح رہے کہ وزیر داخلہ رانا ثناءاللہ نے میڈیا سے گفتگو کرتے ہوئے کہا ہے کہ اسلام آباد سیف سٹی منصوبہ خامیوں کے باعث صحیح طور پر نہ چل سکا، اہم جگہوں اور زیادہ ضرورت کی چیزوں کیلئے4کروڑ روپے مہیا کر دیے گئے۔

انہوں نے کہا کہ اسی سال 100 فیصد سیف سٹی کوریج کی جائے گی، ایک ارب 22 کروڑ روپے کی رقم شہداء کے لیے بقایا جات تھے، افسوس  ہے جنہوں نے قربانیاں دیں ان کے اہلخانہ دھکے کھاتے پھر رہے ہیں۔

  رانا ثناءاللہ نے کہا ہے کہ شہداء کے لواحقین سے معذرت خواہ ہوں، وزیر اعظم نے قطعاً اس کی ادائیگی میں کوئی حیل و حجت نہیں کی، کوشش کریں گے اس مالی سال میں اسے مکمل کریں۔

  وزیر داخلہ نے کہا کہ پولیس والوں اور ان کی فیملیز کے لیے ڈیڈی کیٹڈ اسپتال ہونا چاہیے، اسلام آباد پولیس کا مطالبہ تنخواہیں پنجاب پولیس کے برابر کرنے کا تھا۔

انہوں نے کہا کہ حکومت نے اسلام آباد پولیس کا مطالبہ پورا کر دیا ہے، 667 ملین رقم درکار تھی جو ادا کر دی گئی ہے۔