عیدالاضحیٰ کے دوران فلائیٹ سیفٹی کے معاملے پر سول ایوی ایشن اتھارٹی (سی اے اے) کی ملک بھر کے ایئرپورٹس پر عوامی آگاہی مہم جاری ہے۔

تفصیلات کے مطابق سی اے اے کی کراچی، لاہور، اسلام آباد سمیت تمام ایئرپورٹس پر آگاہی مہم جاری ہے۔

سی اے اے کے ترجمان کا کہنا ہے کہ آلائشیں گوشت کے ٹکڑے ایئرپورٹس سے دور تلف کرنے کیے جائیں، ایئرپورٹس کی حدود کے قریب آلائشیں اور گوشت کے ٹکڑے پھینکنے سے پرندوں کا جہازوں سے ٹکرانے کا خدشہ ہوتا ہے۔

سی اے اے نے عوام سے درخواست کی ہے کہ ایئرپورٹس کے اطراف آلائشیں اور گوشت کے ٹکڑے نہ پھینکیں۔

کراچی سمیت لاہور اسلام آباد ایئرپورٹس کی حدود میں آگاہی مہم کے تحت سی اے اے حکام نے بینرز لگادیئے ہیں اور ملک بھر کے ایئرپورٹس پر سی اے اے ملازمین نے آگاہی مہم کے تحت عوام میں پمفلٹ تقسیم کیے ہیں۔

سی اے اے حکام کے مطابق لاہور ایئرپورٹ پر ہوائی جہاز کے ذریعے فضا سے بھی فلائٹ سیفٹی سے متعلق آگاہی مہم کے پمفلٹ پھینکے گئے ہیں۔

سی اے اے حکام نے بتایا کہ پرندوں کے ٹکرانے سے ایئرلاینز کے جہازوں کو ناقابل تلافی نقصان ہونے اور بڑا حادثہ بھی ہوسکتا ہے۔