رانا تنویر حسین نے کہا ہے کہ کرغزستان اور پاکستان دوستی کے خوشگوار رشتے میں بندھے ہوئے ہیں۔

پاکستان میں کرغزستان کے سفیر توتوئیف اولان بیک اسانکولووچ نے وفاقی وزیر تعلیم و پیشہ وارانہ تربیت رانا تنویر حسین سے ان کے دفتر میں ملاقات کی۔

رانا تنویر حسین نے کرغز جمہوریہ کے سفیر کا خیرمقدم کرتے ہوئے کہا کہ پاکستان اور کرغز جمہوریہ کو موقع سے فائدہ اٹھانا چاہیے اور زیادہ سے زیادہ تعاون کو یقینی بنانا چاہیے۔

انہوں نے کہا کہ دونوں ممالک کے درمیان دوطرفہ تعاون سے پاکستان اور کرغز جمہوریہ کو بہت زیادہ فائدہ ہو سکتا ہے۔

 وفاقی وزیر تعلیم نے کر غز سفیر سے ووکیشنل اور ٹیکنیکل ٹریننگ کے حوالے سے طلبہ کو ہنر مند بنانے اور علم کے تبادلے پر تبادلہ خیال کیا اور کہا کہ دونوں ممالک ایک دوسرے کے تجربات سے فائدہ اٹھا سکتے ہیں۔

انہوں نے کرغز جمہوریہ کے وزیر تعلیم کو تعلیم کے حوالے سے دوطرفہ تبادلہ بڑھانے کی دعوت دی جبکہ وفاقی وزیرتعلیم نے اساتذہ اور طلباءکے باہمی تعاون کو مزید بڑھانے کا خیرمقدم کیا۔

 رانا تنویر حسین نے کہا کہ دونوں ممالک کے درمیان تعاون کے نمایاں امکانات موجود ہیں، پاکستان انجینئرنگ میں کرغز جمہوریہ کی مہارت سے سیکھ سکتا ہے جبکہ کرغز جمہوریہ تعلیمی تحقیق کے حوالے سے پاکستان سے سیکھ سکتا ہے۔

ان کا کہنا تھا کہ پاکستان جمہوریہ کرغزستان کے ساتھ تعلقات کو اگلی سطح پر لے جانے کا خواہاں ہے، جمہوریہ کرغزستان اور پاکستان کے درمیان تعاون کے بے پناہ امکانات ہیں۔

  وفاقی وزیر نے کہا کہ کرغزستان اور پاکستان احترام اور دوستی کے خوشگوار رشتے میں بندھے ہوئے ہیں،کرغزستان اور پاکستان کے عوام طویل عرصے سے قریبی ثقافتی اور روحانی تعلقات رکھتے ہیں۔

رانا تنویر حسین نے یہ بھی کہا کہ دونوں ممالک کے درمیان پہلے سے قائم تعلقات کو سیاسی، اقتصادی اور تعلیم کے شعبوں میں مزید بڑھایا جا سکتا ہے تاکہ دونوں ممالک کو مزید قریب لایا جا سکے۔

وفاقی وزیر تعلیم و پیشہ وارانہ تربیت رانا تنویر حسین نے پاکستان کے طلباء کو ایڈجسٹ کرنے کے حوالے سے  کہا کہ موجودہ حکومت پبلک ایجوکیشن سیکٹر کو آگے بڑھانے کو بہت زیادہ اہمیت د یتی ہے۔

ملاقات میں سیکرٹری وزارت وفاقی تعلیم اور پیشہ ورانہ تربیت ناہید ایس درانی نے بھی موجود تھیں۔