وزیر توانائی سندھ امتیاز شیخ نے کے الیکٹرک کو ہدایت کی ہے کہ لوڈ منیجمنٹ پروگرام میں مذید بہتری لانے کی کوشش کی جائے۔

تفصیلات کے مطابق وزیر توانائی سندھ امتیاز شیخ سے کے الیکٹرک کے سی ای او کا رابطہ ہوا ہے جس دوران شہر میں ہونے والی لوڈ شیڈنگ کے متعلق بات کی ہے۔

انہوں نے کہا ہے کہ احتجاج اور دھرنے مساٸل کا حل نہیں ہیں لیکن ہمارا مقصد کراچی کے عوام کو ریلیف دلانا ہے ۔

انہوں نے مزید کہا کہ وفاق کی جانب سے ملنے والی بجلی میں کمی پر وزیر اعلیٰ سندھ کو آگاہ کردیا ہے، وفاقی حکومت سے بات کرکے مسلۓ کا جلدازجلد حل نکالا جارہا ہے۔

ان کا کہنا تھا کہ کے الیکٹرک عوام کی شکایات کے ازالے کے لیے 24 گھنٹے شکایتی مراکز کو ایکٹو رکھے۔

اس موقع پر سی ای او کے الیکٹرک نے کہا کہ غیر اعلانیہ اور رات کے اوقات میں لوڈ شیڈنگ میں واضع کمی واقع ہوئی ہے۔

انہوں نے بتایا کہ این ٹی ڈی سی نے کے الیکٹرک کو ملنے والی بجلی میں 200 میگاواٹ کی مذید کمی کردی ہے۔

خیال رہے کہ اس سے قبل وزیر اعلیٰ کو وزیر توانائی امتیاز شیخ نے خط لکھا تھا، خط میں وزیر اعلیٰ سندھ کو امتیاز شیخ نے کے الیکٹرک کے اجلاس کی تفصیلات سے آگاہ کیا۔

 امتیاز شیخ نے کہا کہ وزیر اعلیٰ سندھ کو کے الیکٹرک افسران، سندھ حکومت اور اراکین اسمبلی کے اجلاس کی تحریری رپورٹ پیش کردی ہے، سندھ حکومت کی جانب سے وزیر اعظم پاکستان سے گزارش کی جائے کہ این ٹی ڈی سی کو فوری 200 میگا واٹ بجلی اضافے کا حکم دیں۔

ان کا کہنا تھا کہ ایس ایس جی سی ایل کو ہدایات دی جائیں کہ کراچی کے لئے رات کے وقت گیس سپلائی کا پریشر 40 ایم ایم بی ٹی یو مزید بڑھائے، کے الیکٹرک اور سوئی سدرن گیس کمپنی کے مابین واجبات ادائیگی مسئلے کے حل کے لئے وزیر اعظم اور وفاقی حکومت اقدامات کریں۔