ترجمان دفتر خارجہ عاصم افتخار نے کہا ہے کہ سائفر کمیونیکیشن وزیر خارجہ سے چھپائے جانے کا دعویٰ بے بنیاد ہے۔

تفصیلات کے مطابق ترجمان دفتر خارجہ عاصم افتخار نے میڈیا کے سوالات کا جواب دیتے ہوئے کہا ہے کہ واشنگٹن سفارت خانے سے موصول شدہ سائفر کمیونیکیشن وزیر خارجہ یا وزیر اعظم سے چھپائے جانے کا دعویٰ بے بنیاد ہے۔

انہوں نے کہا کہ ایسا کرنے کا سوال ہی پیدا نہیں ہوتا، دفتر خارجہ پیشہ ورانہ بنیادوں پر کام کرتا ہے، دفترخارجہ کے کام پر شکوک و شبہات کا اظہار کرنا نقصان دہ ہوگا۔

شنگھائی تعاون تنظیم کے سیکرٹری جنرل کا دورہ پاکستان

حکام وزارت خارجہ کا کہنا تھا کہ شنگھائی تعاون تنظیم کے سیکرٹری جنرل کا دورہ 21 سے 23 جولائی کو ہو گا، یہ ان کا پاکستان کا پہلا دورہ ہو گا۔

حکام وزارت خارجہ کا کہنا تھا کہ ایس سی او کے موجودہ سیکرٹری جنرل ایس سی او کے وزارتی اجلاس سے قبل پاکستان کا دورہ کر رہے ہیں، دورہ پاکستان کے دوران ایس سی او کے سیکرٹری جنرل وزیراعظم اور وزیر خارجہ سمیت دیگر وزراء سے ملاقاتیں کریں گے۔

حکام وزارت خارجہ کا کہنا تھا کہ موجودہ سیکرٹری جنرل چین کے سابق وزیر خارجہ اور سینئر سفارتکار ہیں، سیکرٹری جنرل پاکستان کی بزنس کمیونٹی سے ملاقات بھی کریں گے،  ایس سی او سیکرٹری جنرل دورہ میں آئی ایس ایس آئی میں لیکچر بھی دیں گے۔

یاد رہے کہ ایس سی او وزراء خارجہ اجلاس 28 اور29 جولائی کو تاشقند میں منعقد ہو گا، وزیر خارجہ بلاول بھٹو اجلاس میں پاکستان کی نمائندگی کریں گے۔