امیر جماعت اسلامی کراچی حافظ نعیم الرحمان نے کہا ہے کہ پورا نظام کرپشن زدہ ہوکر رہ گیا ہے۔

حافظ نعیم الرحمان نے نارتھ ناظم آباد میں الخدمت اجتماعی قربانی کے مرکز کا دورہ کیا اور کہا کہ شہریوں کو عید کی مبارکباد پیش کرتا ہوں، الخدمت اجتماعی قربانی مراکز سے ملنے والی کھالوں سے مستحق افراد کی مدد کرتے ہیں۔

دورے کے دوران نعیم الرحمان نے گفتگو کرتے ہوئے کہا کہ یہ وہی ٹیم ہے جو بلدیاتی انتخابات کے امیدواروں کی ٹیم ہے، الخدمت کے یہ کارکنان عوامی خدمت میں ہر حالات میں کام کرتے ہیں۔

انہوں نے کہا کہ اس وقت شہر کی صورتحال خراب ہے، مرتضیٰ وہاب وہاں جاتے ہیں جہاں پانی کی نکاسی ہوجاتی ہے، پانچ ہزار سٹی وارڈن کہاں ہیں، گھوسٹ ملازمین کی بھرمار ہے

حافظ نعیم الرحمان نے کہا کہ پورا نظام کرپشن زدہ ہوکر رہ گیا ہے، سیاسی ایڈمنسٹریٹر ہیں ہمارے ٹیکس کے پیسوں سے لوگوں کی خرید وفروخت کررہے ہیں۔

امیر جماعت اسلامی کراچی کا کہنا ہے کہ ایک بارش نے دعوں کی قلعی کھول دی ہے، شہر کے دعویداروں کے ایم این اے فنڈ سے ہونے والے کام بھی بارش کے پانی میں بہہ گئے۔

نعیم الرحمان نے کہا کہ ہم ترقی کاسفر وہیں سے شروع کریں جہاں سے نعمت اللہ خان نے چھوڑا تھا، پی پی پی اور ایم کیو ایم نہ پہلے کام کیا نہ اب کریں گے، صفر جمع صفر، صفر ہی ہوتا ہے۔

انہوں نے مزید کہا کہ الیکشن کے عملہ کو پیپلزپارٹی سیاسی مقاصد کیلئے استعمال کررہی ہے، سیاسی جماعتوں کے اتحاد کو الیکشن سے بھاگنے نہیں دیں گے، انتخابات کے امن و امان کی ذمہ داری الیکشن کمیشن اور سندھ حکومت کی ہے۔