ترجمان پیپلزپارٹی فیصل کریم کنڈی نے کہا کہ عمران خان ضمنی انتخابات میں شکست دیکھ کر بوکھلاہٹ کا شکار ہو چکے ہیں۔

اپنے جاری کردہ بیان میں ترجمان پیپلزپارٹی فیصل کریم کنڈی نے کہا کہ عمران خان ضمنی انتخابات میں شکست دیکھ کر بوکھلاہٹ کا شکار ہو چکے ہیں، ان کا سارا زور گوگی بچاؤ مہم پر ہے۔

فیصل کریم کنڈی کا کہنا تھا کہ عمران خان منتخب وزیر آعظم ہوتے تو عدم اعتماد کی تحریک کا مقابلہ کرتے لیکن عدم اعتماد کی تحریک سے ڈر کر عمران خان دم دبا کر بھاگے تھے۔

انہوں نے مزید کہا کہ نیازی صاحب تمہیں قومی اسمبلی کے ذریعے آصف علی زرداری نے بھگایا ہے۔

واضح رہے کہ گزشتہ روز عمران خان نے فیصل آباد میں ہونے والے پی ٹی آئی کے جلسے سے خطاب کرتے ہوئے کہا کہ میں آج آپ سب کو اتنی تعداد میں یہاں آنے کا سلام بھی کرتا ہوں اور اس عزت افزائی کا شکریہ بھی کرتا ہوں۔

سابق وزیراعظم کا کہنا تھا کہ نوجوان علی افضل انشا اللہ اتوار یعنی 17 تاریخ کو ہی یہ میچ جیت جائیں گے، سب کو اس بات کی مبارک باد میں پہلے سے ہی دے دوں ، میں جب سے فیصل آباد میں اترا ہوں، سارا راستہ مجھے لوگ سڑکوں پر نظر آئیں ہیں۔

انہوں نے کہا کہ پاکستان صرف 5 سال کا تھا جب میں پیدا ہوا، میں نے اس ملک کی ساری اونچ نیچ دیکھی ہیں، جو آج اللہ نے میری قوم میں شعور پیدا کیا، میں آج پورے وسوک سے کہتا ہوں کہ اس ملک کی 75 سالا تاریخ میں کبھی بھی قوم اتنی بیدار نہیں تھی جتنی آج ہے۔