پاکستان انٹرنیشنل میری ٹائم ایکسپو اینڈ کانفرنس کے پریمیئر ایڈیشن کا سافٹ لانچ کا انعقاد کیا گیا جبکہ PIMEC کا انعقاد 10 سے 12 فروری 2023 تک کراچی ایکسپو سینٹر میں ہوگا۔

ترجمان پاک بحریہ کے مطابق پاکستان انٹر نیشنل میری ٹائم ایکسپو اینڈ کانفرنس کے پریمئیر ایڈیشن کے سافٹ لانچ کی تقریب اسلام آباد میں منعقد ہوئی۔

ترجمان نے بتایا کہ سافٹ لانچ کی تقریب کے مہمان خصوصی وزیر دفاع خواجہ محمد آصف تھے جبکہ چیف آف دی نیول اسٹاف ایڈمرل محمد امجد خان نیازی بھی تقریب میں شریک تھے۔

ترجمان کا کہنا تھا کہ پاکستان انٹر نیشنل میری ٹائم ایکسپو اینڈ کانفرنس کا انعقاد 10-12فروری 2023 کو ایکسپو سینٹر کراچی میں ہو گا۔

پاک بحریہ کے ترجمان نے بتایا کہ وزیر دفاع نے PIMEC کے ذریعے پاکستان کے میری ٹائم سیکٹر کی صلاحیتوں کو اجاگر کرنے پر پاکستان بحریہ کی کاوشوں کو سراہا۔

انہوں نے کہا کہ پاکستان کے میری ٹائم سیکٹر میں منافع بخش سرمایہ کاری اور تجارت کے بے پناہ مواقع موجود ہیں۔

وزیر دفاع نے مزید کہا کہ پاکستان ایک ذمہ دار ملک کے طور پر بین الاقوامی امن اور استحکام کے لئے اپنا کردار ادا کرتا رہے گا۔

اس موقع پر نیول چیف نے کہا کہ PIMEC-23 پاکستان کی معیشت کو تقویت دینے اور بین الاقوامی سطح پر ہمارے تشخص کو اجاگر کرنے میں مددگار ثابت ہوگی۔

ترجمان کے مطابق تقریب میں وفاقی وزراء، سفیروں، عسکری حکام میڈیا کے نمائندوں سمیت تمام شعبوں سے تعلق رکھنے والے مہمانوں نے شرکت کی۔