سندھ ہائی کورٹ کے حکم پرپولیس نے مغویہ 14 سالہ لڑکی جویریہ کو پنجاب سے بازیاب کرا لیا۔ 

تفصیلات کے مطابق پولیس نے چودہ سالہ جویریہ اور عبدالقدیر کو سٹی کورٹ کراچی جوڈیشنل مجسٹریٹ کے روبرو پیش کیا۔

پولیس کے مطابق جویریہ کو چھ ماہ بعد راجن پور پنجاب سے بازیاب کرایا۔

لیاقت علی ایڈووکیٹ کا کہنا تھا کہ پنجاب کے علاقے راجن پور سے جویریہ کو برآمد کرکے کراچی پہنچایا گیا۔

ایڈووکیٹ لیاقت علی نے کہا کہ پولیس نے جویریہ کے مبینہ شوہرملزم عبدالقدیر کو بھی گرفتار کرلیا۔

مغویہ جویریہ نے عدالت میں بیان دیا کہ وہ اپنی مرضی سے گئی تھی جس کے بعد جوڈیشل مجسٹریٹ نے جویریہ کو دارالامان بھیج دیا۔

جوڈیشل مجسٹریٹ نے پولیس کو جویریہ کی عمر کے تعین کے لئے میڈیکل کرانے کا بھی حکم دیا۔

وکیل لیاقت علی کے مطابق ملزم عبدالقدیر کو عدالتی تحویل میں جیل بھیج دیا گیا ہے، اغوا کا مقدمہ شاہراہ نور جہاں تھانے میں درج ہوا۔ پولیس کےعدم تعاون پر سندھ ہائی کورٹ میں درخواست دائر کر رکھی تھی۔

کانتا کماری قتل کیس

دوسری جانب پسند کی شادی کرنے والی کانتا کماری قتل کیس میں جیل پولیس نے گرفتار ملزم آنند کوایڈیشنل ڈسٹرکٹ اینڈ سیشن کورٹ جنوبی کی عدالت میں پیش کردیا۔

استغاثہ کی جانب سے گواہان کا بیان عدالت میں ریکارڈ کیا گیا جبکہ آئندہ سماعت پر مزید گواہان کو طلب کرتے ہوئے مقدمے کی مزید سماعت 2 اگست تک ملتوی کردی گئی۔

مدعی مقدمہ کا کہنا ہے کہ ہم نے چار گواہان عدالت میں پیش کیے ہیں۔  واقعے کا مقدمہ تھانہ بغدادی میں درج ہے اور مقدمے میں مقتولہ کے شوہر آنند گرفتار ہیں۔