ڈی جی اینٹی کرپشن راناعبدالجبارکی تعیناتی کے خلاف درخواست پرفریقین سےجواب طلب کرلیا گیا۔ 

تفصیلات کے مطابق لاہورہائی کورٹ میں ڈی جی اینٹی کرپشن رانا عبدالجبار کی تعیناتی کے خلاف درخواست پر سماعت ہوئی۔

عدالت نے چیف سیکریٹری سمیت دیگر فریقین سے 27 جولائی کو جواب طلب کرلیا۔

جسٹس فاروق حیدرنے سابق وزیرداخلہ شیخ رشید کی درخواست پر سماعت کی جبکہ شیخ رشید احمد نے رانا عبدالجبار کی تعیناتی کو اظہر صدیق ایڈووکیٹ کے توسط سے چیلنج کیا۔

شیخ رشید کی جانب سے درخواست میں وزیراعلیٰ پنجاب، ڈی جی اینٹی کرپشن سمیت دیگر کو فریق بنایا گیا ہے۔

درخواست میں مؤقف اختیار کیا گیا کہ رانا عبدالجبارگریڈ 20 غیر قانونی طور پر گریڈ 21 کے عہدے پر تعینات کیا گیا۔ وفاقی وزیرداخلہ رانا ثنا اللہ سے ذاتی تعلق کی بنا پر رانا عبد الجبارکو ڈی جی تعینات کیا گیا۔

درخواست گزارنے مؤقف پیش کیا کہ گریڈ 20 کا افسراپنے سے سینئرافسران کی انکوائری نہیں کرسکتا۔ تعیناتی کے فوری بعد شیخ رشید کیخلاف بےبنیاد سیاسی بنیادوں پر کیس بنا دیا۔  رانا عبد الجبار کیخلاف سانحہ ماڈل ٹاؤن سمیت کیسز زیر التواء ہیں۔

وکیل اظہرصدیق نے مؤقف اپنایا کہ میرٹ سے ہٹ کرسیاسی بنیادوں پر رانا عبدالجبار کی تعیناتی کی گئی ہے۔ عدالت رانا عبدالجبار کی بہ طور ڈی جی اینٹی کرپشن تعیناتی کو کالعدم قراردے۔