کراچی کے مختلف علاقوں میں تیز بارش کا سلسلہ ایک بار پھر شروع ہوگیا ہے۔

تفصیلات کے مطابق کراچی کے علاقے کلفٹن، ڈی ایچ اے ڈیفنس، سی ویو، صدر اور بزرٹہ لائن پر تیز بارش کا سلسلہ جاری ہے جبکہ آج سارا دن مختلف علاقوں میں وقفے وقفے سے بارش جاری رہے گی۔

محکمہ موسمیات کا کہنا ہے کہ ہوا کا کم دباؤ اس وقت بحرہ عرب پر ہے، سمندر سے نمی و تقویت حاصل کر کے ساحلی علاقوں میں گہرے بادل بن رہے ہیں، اگر سسٹم اسی شدت سے آگے بڑھا تو آج کافی شدت سے بارش ہوگی۔

محکمہ موسمیات نے بتایا کہ کراچی میں کم سے کم 150 ملی میٹر تک بارش ریکارڈ کی جاسکتی ہے جبکہ آج شہر میں گرج چمک کے ساتھ بارش کے اچھے امکانات ہیں اور بارش سے قبل گردآلود آندھی چلنے کا بھی امکان ہے۔

واضح رہے کہ کراچی میں رواں ہفتے سے وقفے وقفے سے تیز اور ہلکی بارش کا سلسلہ جاری ہے جس کے باعث بعض سڑکوں اور گلیوں میں پانی جمع ہے۔