اسلام آباد پولیس نے عید الاضحیٰ کا خصوصی سیکیورٹی پلان جاری کردیا ہے۔

تفصیلات کے مطابق ضلع بھر میں 2500 پولیس افسران و جوان سیکیورٹی کے فرائض سر انجام دیں گے۔

 نماز عید کے لئے 1032مساجد اور 28امام بارگاہوں پر 04ایس پیز ، 11اے ایس پیزڈی ایس پیز ، 02انسپکٹر ز سمیت 1000سے زائد پولیس افسران و جوان سیکیورٹی کے فرائض سرانجام دیں گے۔

 فیصل مسجد میں نماز عید کے لئے ایک ایس پی،ایک ایس ڈی پی او سمیت 100سے زائد پولیس افسران و جوان سیکیورٹی کے فرائض سرانجام دیں گے۔

تمام مساجد اور امام بارگاہوں کو حساسیت کے مطابق کیٹیگریز میں تقسیم کر دیا گیا ہے۔

تمام مقامات کی نگرانی سیف سٹی کیمروں اور خصوصی پولیس ٹیموں کے ذریعے کی جائے گی۔

 تمام سکییورٹی اقدامات کو ڈی آئی جی آپریشنز سہیل ظفر چٹھہ مانیٹر کریں گے۔

تفریحی مقامات پر کسی بھی لاء اینڈ آرڈر کی صورتحال سے نمٹنے کے لئے سی ٹی ڈی کے خصوصی دستے تعینات ہوں گے اور امن وامان کو ہر صورت قائم رکھا جائے گا۔

مارکیٹس اور سڑکوں پر ٹریفک رش کے لئے ایک ایس پی، 04ڈی ایس پیز سمیت ٹریفک کے 278افسران وجوان ڈیوٹی سرانجام دیں گے، ایس ایس پی ٹریفک تمام ڈیوٹیز کی خود نگرانی کریں گے۔

ون ویلنگ ، ہلڑبازی کی ہرگز اجازت نہیں ہو گی اور قانون کی خلاف ورزی پر ایکشن ہوگا۔

800 سے زائد ایگل سکواڈ کے جوان مختلف علاقوں ، قبرستانوں، عید کے اجتماعات اور مارکیٹوں میں پٹرولنگ کریں گے، 150 سے زائد اسپیشل برانچ کے افسران وجوان بھی نماز عید کے دوران اپنی فرائض سرانجام دیں گے۔

  آئی جی اسلام آباد نے کہا کہ تمام متعلقہ زونل ایس پیز اپنی ذمہ داری کے علاقے میں موجود مساجد اور امام بارگاہوں میں عید الاضحیٰ کی نماز کی ادائیگی کے دوران نمازیوں کی حفاظت کویقینی بنانے کے ذمہ دارہوں گے۔

انہوں نے کہا کہ سخت سیکیورٹی اقدامات کا مقصد نمازیوں اور مذہبی مقامات کی حفاظت کویقینی بنانا، دہشت گرد کارروائیوں کے خلاف سیکیورٹی کو مزید موثر بنانا اور امن و امان کی بحالی کو یقینی بنانا ہے۔

آئی جی اسلام آباد نے کہا کہ تمام زونل ایس پیز، ایس ڈی پی اوز اور ایس ایچ اوز عید الاضحیٰ کی نماز کے دوران اپنے علاقے میں موجود رہیں، عید کی نماز کے دوران تمام ایگلز، تھانہ کی گاڑیاں اور فالکن اپنے اپنے علاقہ میں گشت کریں گی۔

انہوں نے کہا کہ بھارہ کہو کے علاقے میں سی ٹی ڈی کی دو اضافی گاڑیاں لگائی گئی ہیں تاکہ کسی بھی ناخوشگوار واقعے سے نمٹا جا سکے۔