اسپیکر پنجاب اسمبلی چوہدری پرویزالٰہی نے کہا ہے کہ پی ٹی آئی اور ق لیگ کے ورکر دھاندلی کو روکنے کیلئے پہرا دے رہے ہیں۔

تفصیلات کے مطابق  چوہدری پرویز الٰہی اور سابق وفاقی وزیر مونس الٰہی سے سابق اسپیکر قومی اسمبلی اسد قیصر کی ملاقات ہوئی ہے۔

 ملاقات میں ضمنی انتخاب اور پنجاب کی سیاسی صورتحال پر تبادلہ خیال کیا گیا۔

اسپیکر پنجاب اسمبلی چوہدری پرویزالٰہی کا کہنا تھا کہ ہمارے امتحان کے ساتھ ساتھ الیکشن کمیشن کا بلکہ زیادہ سخت اور بڑا امتحان ہے۔

انہوں نے کہا کہ الیکشن کمیشن کے پاس سنہری موقع ہے کہ وہ غیر جانبداری کا ثبوت دے، الیکشن کمیشن اپنے پچھلے غلط کاموں کا دھونا بھی دھو دے۔

چوہدری پرویزالٰہی نے کہا کہ پی ٹی آئی اور ق لیگ کے ورکر دھاندلی کو روکنے کیلئے پہرا دے رہے ہیں، بین الاقوامی میڈیا کی بھی حالات پر پوری نظر نہیں بلکہ وہ خود  تمام پولنگ اسٹیشنز پر نظر آ ئے گی۔

انہوں نے کہا کہ  انشاء اللہ عوام بیدار ہو چکی ہے،  جعلی اعلانات سے ان کو گمراہ نہیں کیا جاسکتا، 17 جولائی حق اور سچ کی فتح کا دن ہے لوٹے اور جعلی حکمرانوں کا بوریا بستر کل گول ہو گا۔

دوسری جابب اسد قیصر کا کہنا تھا کہ ٰ ضمنی انتخاب میں لوٹے امیدواروں کو عبرتناک شکست ہوگی، دھاندلی کے تمام منصوبوں کا ڈٹ کر مقابلہ کیا جائے گا۔

اسد قیصر کا مزید کہنا تھا کہ حکومت پنجاب کی مداخلت پر الیکشن کمیشن کو سخت ایکشن لینا چاہیے، پنجاب میں 17 جولائی کو عوام کا فیصلہ تحریک انصاف کے حق میں ہوگا۔