گورنر پنجاب محمد بلیغ الرحمان نے کہا ہے کہ صنعتوں کو بلاتعطل بجلی کی فراہمی کی کوشش کررہے ہیں۔

محمد بلیغ الرحمان سے بیلجیم کے سفیر فلپ برونچین کی ملاقات ہوئی جس میں دو طرفہ تعلقات اور تجارت کو فروغ دینے کے حوالے سے تبادلہ خیال کیا گیا۔

ملاقات میں گورنر پنجاب نے گفتگو کرتے ہوئے کہا کہ پاکستان اور بلیجیم کے درمیان دو طرفہ تعلقات وقت گزرنے کے ساتھ مضبوط ہو رہے ہیں۔

انہوں نے کہا کہ ملک کی معاشی ترقی کے لیے انڈسٹریز کو سہولیات دینا حکومت کی اولین ترجیح ہے۔

بلیغ الرحمان نے کہا کہ صنعتوں کو بلاتعطل بجلی کی فراہمی کی کوشش کررہے ہیں، صخت اور تعلیم کے شعبوں میں ترقی کے لیے کوشاں ہیں۔

گورنر پنجاب کا کہنا تھا کہ ٹیکسٹائل سیکٹر کا یورپین ممالک میں پاکستانی برآمدات میں اہم کردار ہے، یورپی یونین پاکستان کا اہم تجارتی شراکت دار ہے۔

محمد بلیغ الرحمان نے مزید کہا کہ جی ایس پی پلس اسٹیٹس ملنے سے پاکستان کی یورپ میں برآمدات میں اضافہ ہوا ہے۔

دوسری جانب بیلجیم کے سفیر فلپ برونچین نے گفتگو کرتے ہوئے کہا کہ بلیجیم اور پاکستان کے درمیان دو طرفہ تجارت بڑھ رہی ہے، پاکستان اور بیلجیم کے درمیان تجارتی تعلقات میں مزید وسعت کے خواہاں ہیں۔