سابق اسپیکر قومی اسمبلی ڈاکٹر فہمیدہ مرزا نے کہا ہے کہ ملک میں انتشار پھیلانے کی کوشش کی جا رہی ہے۔

تفصیلات کے مطابق سابق اسپیکر قومی اسمبلی ڈاکٹر فہمیدہ مرزا نے صحافیوں سے غیر رسمی گفتگو کرتے ہوئے کہا کہ قومی اسمبلی میں حقیقی اپوزیشن پر بولنے پر قدغن لگا دی گئی ہے۔

انہوں نے کہا کہ اسپیکر قومی اسمبلی واضح طور پر جانبداری کا مظاہرہ کررہے ہیں، قومی اسمبلی میں حکومت اور فرینڈلی اپوزیشن نما حکومت کا تماشہ جاری ہے، اسپیکر راجہ پرویز اشرف ایوان کے کم حکومت کے نگہبان زیادہ ہیں۔

      ڈاکٹر فہمیدہ مرزا نے کہا ہے کہ اندرون سندھ میں سیلاب نے تباہی مچا رکھی ہے، ایوان میں سیلابی صورتحال پر اسپیکر بات نہیں کرنے دے رہے، سندھ حکومت سیلاب سے بچانے کے لیے کوئی کام نہیں کررہی۔

 سابق اسپیکر قومی اسمبلی نے کہا کہ مکمل مشاورت اور چند حکومتی ممبران سے سوچ بچار کے بعد اسپیکر نے 11 استعفے منظور کیے، ان حلقوں کے ممبران کے استعفوں کو منظوری کے لیے چنا گیا جہاں تحریک انصاف کم مارجن سے جیتی تھی۔

انہوں نے کہا کہ ملک میں انتشار پھیلانے کی کوشش کی جارہی ہے۔