ترجمان دفتر خارجہ نے کہا ہے کہ ہم حکومت ہند پر زور دیتے ہیں کہ وہ کشمیریوں کو نشانہ بنانے سے باز رہے۔

 برہان وانی کی چھٹی برسی پر بیان جاری کرتے ہوئے ترجمان دفتر خارجہ نے کہا کہ نوجوان کشمیری رہنما برہان مظفر وانی کی آج چھٹی برسی منائی جا رہی ہے۔

ترجمان دفتر خارجہ کا کہنا تھا کہ کشمیری عوام کی حق خودارادیت کے حصول کی جدوجہد میں برہان وانی کی خدمات اور قربانی کو خراج تحسین پیش کرتے ہیں۔

انہوں نے کہا کہ  برہان وانی کو کشمیر کی آزادی کی تحریک کے چہرے کے طور پر خراج عقیدت پیش کرتے ہیں اور ہم حکومت ہند پر زور دیتے ہیں کہ وہ طاقت کے اندھا دھند استعمال اور کشمیریوں کو نشانہ بنانے سے باز رہے۔

 ترجمان دفتر خارجہ کا مزید کہنا تھا کہ عالمی برادری اقوام متحدہ کی قراردادوں اور کشمیری عوام کی خواہشات کے مطابق تنازعہ کشمیر کے پرامن حل کے لیے اپنا کردار ادا کرے۔