محکمہ موسمیات کے مطابق بارش برسانے والا ایک اور مضبوط سسٹم کراچی کی جانب تیزی سے بڑھ رہا ہے۔

 محکمہ موسمیات کے چیف میٹرولوجسٹ سردار سرفراز کا کہنا ہے کہ نیا سسٹم 18 ، 19 جولائی تک کراچی میں بارشیں برسائےگا جبکہ کراچی میں موجودہ بارشوں سے زیادہ بارش ہوگی۔

 چیف میٹرولوجسٹ نے بتایا کہ کراچی میں 60 سے 80 ملی میٹر تک بارش ہوسکتی ہے تیزبارش والا سسٹم اس وقت مشرقی بھارت میں موجود ہے۔

سردار سرفراز کا کہنا ہے کہ نیا سسٹم راجستھان سے آگے پاکستان میں داخل ہو گا، کراچی میں موجودہ بارش کا سلسلہ اس سسٹم کے تحت ہے۔

چیف میٹرولوجسٹ کا مزید کہنا ہے کہ نئے مضبوط سسٹم کا کچھ حصہ بحیرہ عرب پر اب بھی موجود ہے اور موجودہ بارشوں کا سلسلہ 2، 3 دن مزید چلے گا۔

کراچی کے مختلف علاقوں میں مسلسل بارش، ٹریفک کی روانی متاثر

بارش کا پانی سڑکوں پر جمع ہونے کے باعث ٹریفک کی روانی متاثر رہی اور کئی گاڑیاں اور موٹرسائیکلیں بند ہوگئیں جس کے باعث شہریوں کو پریشانی کا سامنا کرنا پڑا۔

کلفٹن سب میرین انڈر پاس اور کے پی ٹی انڈر پاس بھی بند کردیے گئے جبکہ لیاقت آباد سی ون ایریا میں بارش کا پانی گھروں میں داخل ہوگیا۔

شدید بارش کے بعد ملیر ندی یار محمد گوٹھ میں پانی کا ریلہ داخل ہوگیا، جس کے باعث شہریوں کو نقل مکانی کرنا پڑی۔

ملیر ندی لنک روڈ کو بھی پانی آنے کے باعث بند کردیا گيا ہے۔

کراچی میں دن بھر موسلا دھار بارش کا امکان

محکمہ موسمیات کا کہنا ہے کہ کراچی کو بارش برسانے والے بادلوں نے اپنی لپیٹ میں لیا ہوا ہے، اس لیے مختلف علاقوں میں دن بھر موسلا دھار بارش ہو سکتی ہے۔

 بحیرۂ عرب سے مسلسل بارش برسانے والے بادل شہر کی جانب بڑھ رہے ہیں، ٹھٹھہ، بدین اور کیٹی بندر سے بادلوں کے آنے کا سلسلہ بھی جاری ہے۔

 شہر میں مزید 2 سے 3 گھنٹے بارش کا سلسلہ جاری رہ سکتا ہے۔