پاکستان کے دارالحکومت اسلام آباد میں قتل کی جانے والی لڑکی  نور مقدم کی والدہ ابھی تک انصاف کی منتظر ہیں ۔

نور مقدم کی والدہ نے اپنی بیٹی کو انصاف دلانے کےلئے ایک جذباتی ویڈیو پیغام جاری کیا ، جوکہ کافی وائرل ہو گیا ہے۔

اس ویڈیو بیان پر اداکارہ اشنا شاہ نے بھی ردعمل دے کراُن کے اہلِ خانہ کے لیے دُعا کی۔

ویڈیو بیان میں نور مقدم کی والدہ کا کہنا ہے کہ نور کو 20 جولائی کو ہم سے بچھڑے ایک سال ہو جائے گا اور ہم نے نور کے بغیر یہ ایک سال جس طرح گُزارا ہے، وہ میں، میرے رشتے دار اور دوست جانتے ہیں۔

نور مقدم کی والدہ نے کہا کہ ہم راتوں کو سو نہیں سکے، ہمیں دن کو سکون نہیں ملا لیکن میں آج سب ماؤں بہنوں سے اپیل کرتی ہوں کہ آپ سب 20 جولائی کو F9 پارک آ کر میرا اور اپنا ساتھ دیں۔

اُنہوں نے مزید کہا کہ میں نہیں چاہتی کہ جس طرح میری نور کے ساتھ ہوا، وہی سب مستقبل میں کسی اور کی نور کے ساتھ ہو، ہمیں اپنی بچیوں کی حفاظت کے لیے نکلنا ہوگا، میرا ساتھ دیں۔

واضح رہے کہ گزشتہ برس 20 جولائی کو اسلام آباد میں تھانہ کوہسار کی حدود ایف سیون فور میں 27 سالہ لڑکی نور مقدم کو تیز دھار آلے سے سفاکی سے قتل کیا گیا تھا۔