سعودی عرب کے سفیر نے سربراہ پاک بحریہ سے ملاقات کی ہے جس دوران دوطرفہ بحری تعاون کے مزید فروغ پر تبادلہ خیال کیا گیا۔

ترجمان پاک بحریہ کے مطابق سعودی عرب کے پاکستان میں سفیر نواف بن سعید المالکی نے نیول ہیڈ کوارٹرز اسلام آباد کا دورہ کیا ہے۔

ترجمان نے بتایا کہ اس دوران سربراہ پاک بحریہ ایڈمرل محمد امجد خان نیازی سے سعودی سفیر کی ملاقات بھی ہوئی ہے۔

ترجمان کا کہنا تھا کہ ملاقات کے دوران باہمی دلچسپی کے امور اور دوطرفہ بحری تعاون کے مزید فروغ پر تبادلہ خیال کیا گیا اور ساتھ ہی خطے کی میری ٹائم سیکیورٹی صورتحال پر بات چیت کی گئی۔

ترجمان پاک بحریہ کے مطابق اس موقع پر سعودی سفیر نے خطے میں امن و استحکام کو یقینی بنانے میں پاک بحریہ کے کردار کو سراہا۔