ایڈمنسٹریٹر کراچی مرتضیٰ وہاب نے کہا ہے کہ حلیم عادل نے زمینوں کے کاغذات میں ہیر پھیر کی ہے۔

تفصیلات کے مطابق ایڈمنسٹریٹر کراچی مرتضیٰ وہاب نے اپنے بیان میں کہا ہے کہ حلیم عادل نے زمینوں کے کاغذات میں ہیر پھیرکی ہے، جعلی کاغذات بنا کر زمینوں پر قابض ہیں۔

انہوں نے کہا کہ حلیم عادل کے خلاف قانون کے مطابق کارروائی کی گئی، لوگوں کو گمراہ کرنے کی کوشش نہ کریں، قانون کے مطابق ہر شخص برابر ہے، کوئی تفریق نہیں۔

    مرتضیٰ وہاب نے کہا ہے کہ ان پر ملیر کی زمینوں پر انکوائری چل رہی تھی، اگر سرکاری اراضی پر کوئی قابض ہے تو اس کے خلاف کارروائی ہونی چاہیے، اگر یہ کارروائی قانون کے مطابق نہیں ہوئی تو دو چار روز میں پتہ چل جائے گا۔

     ایڈمنسٹریٹر کراچی مرتضیٰ وہاب نے کہا ہے کہ اگر انہیں اسپتال جانا ہے تو ہم ان کو شفٹ کریں گے، وہ خوامخواہ سیاسی رنگ دے رہے ہیں۔

واضح رہے کہ سندھ اسمبلی میں اپوزیشن لیڈر اور پی ٹی آئی رہنما حلیم عادل شیخ کو رات گئے لاہور کے نجی ہوٹل سے حراست میں لے لیا گیا جبکہ پولیس نے تاحال ان کی گرفتاری کی تصدیق نہیں کی۔

حلیم عادل شیخ کے ترجمان کی جانب سے جاری کردہ اس بیان پر پولیس کی تاحال تصدیق سامنے نہیں آئی ہے۔

دوسری جانب سابق گورنر سندھ عمران اسماعیل نے مذمت کرتے ہوئے کہا  کہ حلیم عادل شیخ کی گرفتاری کہیں ظاہر نہیں کی جارہی۔

انہوں نے خدشہ ظاہر کیا کہ سندھ حکومت کے جرائم پیشہ افراد نے انہیں اغوا کیا ہے، کسی بھی قسم کا نقصان ہوا تو ذمہ دار سندھ حکومت ہو گی۔