آئی جی سندھ پولیس کی جانب سے عیدالاضحیٰ کے موقع پر عوام کے لئے پیغام جاری کیا گیا ہے۔

آئی جی سندھ غلام نبی میمن نے اپنے جاری کردہ بیان میں کہا کہ سندھ پولیس اور عوام کو عیدالاضحیٰ سال 2022 مبارک ہو۔

انہوں نے کہا کہ سندھ پولیس کے افسران اور جوان عوام کے جان ومال کی سلامتی اور انھیں درپیش مسائل و مشکلات کے اذالے کے لئے ہمہ وقت مستعد اور مصروف عمل ہیں۔

آئی جی سندھ نے کہا کہ سندھ پولیس کے افسران اور جوان عید کے تینوں دنوں اور اسکے بعد آنے والے دنوں میں سیکیورٹی اقدامات کے تسلسل کو جاری رکھیں گے۔

یہ بھی پڑھیں: ملک بھر میں عیدالاضحیٰ آج مذہبی عقیدت واحترام کیساتھ منائی جارہی ہے

غلام نبی میمن کا کہنا ہے کہ بحیثیت ایک ذمہ دار قوم ہمارا یہ فرض ہے کہ نماز عید اور دیگر سرگرمیوں کے دوران امن وامان اور بھائی چارگی کی فضا کو فروغ دیں۔

انہوں نے کہا کہ قربانی کے مقدس فریضہ کی ادائیگی کے دوران حکومت کی جانب سے جاری کردہ ضابطہ اخلاق اور اسکے رہنما اصولوں پیش نظر رکھا جائے۔

آئی جی سندھ نے اپیل کی ہے کہ صوبہ سندھ کے باشعور لوگ عید کے موقع پر اپنی اور دوسروں کی حفاظت کو مقدم رکھیں اور پولیس کے ساتھ بھرپور تعاون کو یقینی بنائیں۔