چیف الیکشن کمشنر نے صوبائی حکومت کو بذریعہ چیف سیکریٹری اہم پیغام دیا ہے۔

چیف الیکشن کمشنر سکندر سلطان راجہ کی سربراہی میں پنجاب 20 حلقوں میں ضمنی انتخابات کے انتظامات اور سیکورٹی پر پنجاب سیکریٹریٹ میں اہم اجلاس ہوا جس میں چیف سیکریٹری پنجاب کامران افضل، آئی جی پنجاب راو سردار، ایڈیشنل سیکریٹری داخلہ، ایڈیشنل ڈی جی رینجرز پنجاب سمیت دیگر متعلقہ افسران نے شرکت کی۔

چیف الیکشن کمشنر سکندر سلطان راجہ نے صوبائی حکومت کو بذریعہ چیف سیکریٹری اہم پیغام دیتے ہوئے کہا ہے کہ صوبائی حکومت پر واضح کر دیں کہ ضابطہ اخلاق کی خلاف ورزی کو برداشت نہیں کیا جائے گا۔

انہوں نے کہا کہ پبلک آفس ہولڈر اگر خلاف ورزی کرے تو سخت تادیبی کارروائی کی جائے گی، خلاف ورزی کی صورت میں الیکشن سے نااہلی اور فوجداری کارروائی بھی کی  جا سکتی ہے۔

   چیف الیکشن کمشنر نے کہا کہ امن و امان قائم رکھنا، پولنگ میٹیریل اور انتخابی عملہ کی سیکیورٹی صوبائی حکومت کی ذمہ داری ہے، آپ کا رول اہم ہے، آپ ریاست کے ملازم ہیں، بغیر سیاسی دباؤ کے کام کریں، ہم بلا امتیاز کارروائیاں کر رہے ہیں۔

  چیف الیکشن کمشنر نے ڈیوٹی انجام دینے والے افسران و اہلکاروں کو پیغام دیتے ہوئے کہا کہ اگر آپ کا کوئی اہلکار سیاسی دباؤ میں آئے یا کسی پارٹی کا ساتھ دے فوری کمیشن کو رپورٹ کریں۔

انہوں نے کہا کہ الیکشن کمیشن پر عوام کا اعتماد بڑھے گا تو جمہوریت و ریاست مضبوط ہوں گے۔