امیر جماعت اسلامی سراج الحق نے کہا ہے کہ ملک میں اس وقت شدید لوڈ شیڈنگ اور معاشی بدحالی ہے۔

تفصیلات کے مطابق امیر جماعت اسلامی سراج الحق نے لاہور میں پریس کانفرنس کرتے ہوئے کہا ہے کہ حالیہ بارشوں کی وجہ سے درجنوں افراد کی اموات اور لاکھوں کا نقصان ہوچکا ہے۔

انہوں نے کہا کہ ملک میں اس وقت شدید لوڈ شیڈنگ اور معاشی بدحالی ہے لیکن پی ڈی ایم اور پی ٹی آئی کو ان مسائل کا کوئی ادراک نہیں ہے، سیاسی کشمکش جاری ہے، 2018 کا الیکشن متنازعہ تھا، اس وقت سے ابتک حالات خراب ہیں۔

سراج الحق نے کہا ہے کہ پی ڈی ایم، پیپلزپارٹی اور پی ٹی آئی نے باہمی لڑائی خود حل کرنے کی بجائے ہمیشہ راولپنڈی کی طرف دیکھا ہے، کبھی پی ڈی ایم نے فوج پر الزامات لگا کراسے متنازع بنایا تو کبھی پی ٹی آئی کی طرف سے یہ کیا گیا۔

امیر جماعت اسلامی نے کہا کہ اب عدالتوں کو متنازعہ بنا دیا گیا، سوشل میڈیا پر عدلیہ کیخلاف باتیں ہورہی ہیں، وزیراعلیٰ پنجاب کے انتخاب کے تنازعہ پر پھر پی ڈی ایم اور پی ٹی آئی عدالت میں ہیں۔