اسلام آباد ہائی کورٹ نے ممنوعہ فنڈنگ کیس میں لارجر بنچ تشکیل دینے کا فیصلہ کر لیا۔ 

تفصیلات کے مطابق اسلام آباد ہائی کورٹ میں ممنوعہ فنڈنگ کیس میں سماعت کے دوران وکیل انور منصور نے دلائل دیے کہ الیکشن کمیشن کی فیکٹ فائنڈنگ ریورٹ ہم نے چیلنج کی ہے۔

وکیل انور منصور نے مؤقف اپنایا کہ حنیف عباسی کیس میں سپریم کورٹ نے واضح کیا ہے۔ اکاؤنٹس مختلف وجوہات کی بنا پر ظاہر کرنا ضروری نہیں تھا۔ پیسہ یہاں سے گیا ہے صوبوں کے اکاؤنٹس میں، اس سے ان کو ظاہر کرنا ضروری نہیں تھا۔

قائم مقام چیف جسٹس اسلام آباد ہائی کورٹ جسٹس عامر فاروق نے کہا کہ جہاں تک مجھے یاد پڑتا ہے ولی خان کیس کے بعد یہ پہلا کیس ہے۔

عدالت نے کہا کہ اس کیس میں ریفرنس بھیجوا دیا گیا تھا اس کیس میں ریفرنس نہیں بھیجوایا گیا؟

وکیل انورمنصورنے عدالت سے استدعا کی کہ شوکاز نوٹس کی حد تک کوئی ایکشن نہ لیا جائے۔

قائم مقام چیف جسٹس عامر فاروق نے ریمارکس دیے کہ یہ معاملہ بھی لارجر بنچ ہی دیکھے گا۔

اسلام آباد ہائی کورٹ نے ممنوعہ فنڈنگ کیس لارجر بنچ کے سامنے مقرر کرنے کی ہدایت کرتے ہوئے سماعت 18 اگست تک ملتوی کردی۔