پی ٹی آئی نے الیکشن کمیشن کی جانب سے قومی اسمبلی کے 9 حلقوں میں ضمنی الیکشن کا شیڈول چیلنج کر دیا۔

تفصیلات کے مطابق اسلام آباد ہائی کورٹ میں الیکشن کمیشن کی جانب سے قومی اسمبلی کے 9 حلقوں میں ضمنی الیکشن کے شیڈول سے متعلق درخواست کی سماعت ہوئی۔

قائم مقام چیف جسٹس عامر فاروق نے درخواست پرسماعت کی جبکہ پی ٹی آئی کی جانب سے فیصل چوہدری عدالت میں پیش ہوئے۔

تحریک انصاف کے وکیل نے عدالت کے سامنے مؤقف پیش کیا کہ الیکشن کمیشن نے ضمنی الیکشن کا شیڈول جاری کیا۔

قائم مقام چیف جسٹس عامرفاروق نے کہا کہ آپ الیکشن کمیشن کا شیڈول معطل کرانا چاہتے ہیں۔

وکیل فیصل چوہدری نے جواب دیا کہ ہم چاہتے ہیں تمام 123 حلقوں پرضمنی الیکشن کرایا جائے۔ الیکشن کمیشن نے 9 ضمنی الیکشن شیڈول جاری کرکے بدنیتی کا مظاہرہ کیا۔

قائم مقام چیف جسٹس اسلام آباد ہائی کورٹ نے کہا کہ اسپیکر کے منظورشدہ استعفوں پر الیکشن کمیشن نے شیڈول جاری کیا۔ الیکشن میں حصہ لیں۔

وکیل تحریک انصاف نے جواب دیا کہ ہم الیکشن میں بھرپور حصہ لیں گے۔ الیکشن کمیشن نے کیس کو 16 اگست تک ملتوی کیا ہے۔

اسلام آباد ہائیکورٹ نے الیکشن کمیشن کو نوٹس جاری کرتے ہوئے الیکشن کمیشن سے جواب طلب کرلیا۔