عدالت نے حلقہ بندیوں سےمتعلق ایم کیو ایم کی چھ درخواستوں پرسماعت غیرمعینہ مدت تک ملتوی کردی۔

کراچی کے مختلف اضلاع کی حلقہ بندیوں کیخلاف چھ درخواستوں کی سماعت ہوئی۔

سندھ ہائی کورٹ میں کراچی کے مختلف اضلاع کی حلقہ بندیوں کے خلاف ایم کیوایم کی  چھ درخواستوں کی سماعت ہوئی۔

چیف جسٹس سندھ ہائی کورٹ نے سماعت کرتے ہوئے کہا کہ حلقہ بندیوں سے متعلق سپریم کورٹ نے بھی درخواستیں مسترد کردی ہیں۔

وکیل درخواست گزارنے کہا کہ موجودہ درخواستیں ووٹرزکی جانب سے ڈیلیمیٹیشن اپیلیٹ اتھارٹی کے فیصلے کے خلاف ہیں۔ جب تک سپریم کورٹ کا حکم نامہ پیش نہیں کریں گے کوئی نیا حکم جاری نہیں کرسکتے۔

عدالت نے سپریم کورٹ کے فیصلے کی نقل پیش کرنے کی ہدایت کرتے ہوئے سماعت غیرمعینہ مدت تک ملتوی کردی۔

درخواست میں الیکشن کمیشن پاکستان، صوبائی الیکشن کمیشن، سیکرٹری لوکل گورنمنٹ اور دیگر کو فریق بنایا گیا ہے۔

ڈاکٹر شہاب امام ایڈووکیٹ نے مؤقف پیش کیا کہ ضلع غربی میں یوسیز اور ٹاونز کی تشکیل  غلط اور بدنیتی پر مبنی ہے، اورنگی ٹاون، مومن آباد، بلدیہ، نارتھ ناظم آباد اور شاہ فیصل کالونی میں حلقہ بندیاں انتہائی غلط ہیں۔

وکیل ایم کیو ایم نے کہا کہ اپیلیٹ اتھارٹی نے بھی ہمارا موقف نہیں سنا،  یہ غیر منصفانہ عمل ہے۔ اگر حلقہ بندیاں درست نا ہوئیں تو انتخابات منصفانہ نہیں ہوں گے۔

وکیل درخواست گزار نے کہا کہ صوبے میں بلدیاتی انتخابات شروع ہونے ہی والے ہیں، درخواستوں  کا فیصلہ جلد کیا جائے۔