گجرات کو ڈویژن کا درجہ دینے کا اقدام لاہور ہائی کورٹ میں چیلنج کر دیا گیا۔

تفصیلات کے مطابق عدالت نے پنجاب حکومت سمیت دیگر فریقین سے تفصیلی رپورٹ اور شق وار جواب طلب کر لیا۔

عدالت نے تحریری حکم میں کہا کہ سرکاری وکیل متعلقہ افسران سے ہدایات لے کرآئندہ سماعت 20 اکتوبرتک عدالت کو آگاہ کریں۔

جسٹس رسال حسن سید نے دو صفحات پر مشتمل تحریری حکم نامہ جاری کیا۔

درخواست قمرجاوید نے سینئر وکیل عابد ساقی کی وساطت سے دائرکی جس میں درخواست گزار کی جانب سے مؤقف اپنایا گیا کہ گجرات کو ڈویژن کا درجہ دینے سے قبل قانونی تقاضے پورے نہیں کیے گئے۔

درخواست گزار کا مؤقف تھا کہ اسٹیک ہولڈرزسے مشاورت کے بغیر ہی گجرات کو ڈویژن کا درجہ دے دیا گیا ہے۔  حافظ آباد کو گجرات میں شامل کرنا بھی خلاف قانون ہے جس سے مشکلات میں اضافہ ہو گیا ہے۔

درخواست میں استدعا کی گئی کہ لاہورہائی کورٹ گجرات کو ڈویژن قرار دینے کا نوٹیفیکیشن کالعدم قرار دے۔