اسمارٹ فون کی مارکیٹ میں اوپو نے اپنی جگہ بنانے کے لیے لاتعداد جتن کئے ہیں اور اب توقع ہے کہ اس کی اگلی اسمارٹ واچ تھری سیریز کی تمام مصنوعات بھی دس اگست 22 کو پیش کی جائیں گی۔

اس کی وجہ یہ بتائی جارہی ہے کہ عین اسی روز سام سنگ بھی اپنی جدت بھری تمام مصنوعات پیش کررہا ہے جس میں بطورِ خاص فولڈ ہونے والے گیلکسی زیڈ فلپ فون بھی شامل ہیں۔ اگرچہ اوپو نے اپنی پریس ریلیز میں صرف ماہِ اگست کا لفظ استعمال کیا ہے تاہم ’ڈجیٹل چیٹ اسٹیشن‘ نامی مخبر ویب سائٹ کا اندازہ ہے کہ عین ممکن ہے کہ اوپو واچ سیریز دس اگست کو منظرِ عام پرلائی جائیں گی بلکہ فروخت شروع کردی جائے گی۔

واضح رہے کہ صحت اور فٹنس کی وجہ سے اسمارٹ فون کے ساتھ اسمارٹ واچ بھی دنیا بھر میں اپنی اچھی مارکیٹ رکھتی ہے اور شاید ہی کوئی چھوٹی بڑی کمپنی ایسی ہو جس نے اسمارٹ واچ پر طبع آزمائی نہ کی ہو۔

توقع ہے کہ اوپو واچ کے تین ماڈل پیش کئے جائیں گے۔ ان میں سے کم سے کم ایک ماڈل میں اسنیپ ڈریگن ڈبلیو فائیو جنریشن ون ایس او سی موجود ہے۔ کیونکہ اس سے قبل اوپو اس چپ سیٹ کے استعمال کا بار بار اشارہ کرچکا ہے۔ اس ضمن میں بعض تصاویر بھی زیرِ گردش ہیں لیکن ان کی تصدیق نہیں ہوسکی ہے کہ یہ واقعی اوپو کا ڈیزائن ہیں؟

دیگر تفصیلات کے مطابق اس میں ایل پی ٹی او ڈسپلے ، اپالو فور ڈویل چپ، ای سی جی مشین، اور دیگر فنکشن شامل ہیں۔