فلسطینی نژاد امریکی ماڈل و اداکارہ بیلا حدید نے انکشاف کیا ہے کہ والدین کی طلاق کے سبب اسلامی طرز کی زندگی گزارنے کا موقع نہیں ملا۔

حال ہی میں اداکارہ نے ایک انٹرویو میں اپنی زندگی کے سب سے بڑے پچھتاوے اور نسل پرستی کا نشانہ بننے سے متعلق بات کی ۔

انہوں نے بتایا ہے کہ بچپن میں والدین کی طلاق کے سبب وہ کیلیفورنیا میں رہیں، اُنہیں اس دوران اسلامی تعلیم سیکھنے اور اسلامی طرز کی زندگی گزارنے کا موقع نہیں ملا۔

امریکی ماڈل کا کہنا تھا کہ وہ فلسطین کی ثقافت سے بھی دور رہیں جس کا اُنہیں پچھتاوا ہے۔

اداکارہ نے کہا کہ مجھے ایک عرب طالبہ ہونے کی وجہ سے اسکول میں نسل پرستانہ نام سے پکارا جاتا تھا۔

بیلا حدید نے بتایا کہ میں نے اسکول میں ساتھی طالبِ علموں کی جانب سے برے رویئے کا سامنا کیا، میں اسکول میں خود کو تنہا اور اداس محسوس کیا کرتی تھی۔

یاد رہے کہ بیلا حدید فلسطین میں اسرائیلی جارحیت اور مظالم کو اجاگر کرنے اور اس موضوع پر سب سے زیادہ بولنے والی مشہور شخصیات میں سے ایک ہیں۔