عدالت نے ایم پی ایز پی ٹی آئی شبیرگجر، خالد محمود سمیت ملزمان کی عبوری ضمانت میں توسیع کردی۔

تفصیلات کے مطابق لاہور کی مقامی عدالت میں ضمنی الیکشن میں پی پی 167 میں لیگی رہنما نذیرچوہان پر فائرنگ کے معاملے میں پی ٹی آئی ایم پی اے شبیر گجر سمیت دیگر کی عبوری درخواست ضمانت پر سماعت ہوئی۔

سیشن عدالت لاہور نے تحریک انصاف کے ایم پی اے شبیر گجر، خالد محمود سمیت ملزمان کی عبوری ضمانت میں 2 ستمبر تک توسیع کی۔

ایڈیشنل سیشن جج مظہر فرید نے کیس پر سماعت کی جبکہ چوہدری شبیر گجر سمیت نامزد ملزمان عبوری ضمانت کے لئے پیش ہوئے۔

ملزمان کی جانب سے سلیم لادھی ایڈووکیٹ بھی عدالت میں پیش ہوئے۔

ملزمان نے عبوری ضمانت کی درخواستیں دائر کررکھی ہیں۔ جس میں ملزمان کے وکلا نے مؤقف پیش کیا کہ نذیر چوہان پر فائرنگ کے معاملے سے کوئی تعلق نہیں۔ پولیس نے سیاسی بنیادوں پر جھوٹا مقدمہ درج کیا۔

وکیل ملزمان نے عدالت سے استدعا کی عدالت عبوری ضمانت منظورکرے۔