پاکستان اور چین کی جانب سے باہمی مفاد کیلئے مختلف شعبوں میں دوطرفہ تعاون کو مزید فروغ دینے کے عزم کا اعادہ کیا گیا ہے۔

تفصیلات کے مطابق چیئرمین سینیٹ محمد صادق سنجرانی سے پاکستان میں چین کے سفیر نونگ رونگ کی پارلیمنٹ ہاوُس میں ملاقات ہوئی ہے۔

ملاقات میں دوطرفہ تعلقات سمیت باہمی دلچسپی کے امور پر تبادلہ خیال کیا گیا جبکہ پاکستان اور چین کی جانب سے باہمی مفاد کیلئے مختلف شعبوں میں دوطرفہ تعاون کو مزید فروغ دینے کے عزم کا اعادہ کیا گیا ہے۔

اسکے علاوہ دونوں ملکوں کا خطے میں امن ، خوشحالی اور ترقی کے فروغ کے لیے اجتماعی کوششوں کی ضرورت پر زور دیا گیا۔

چیئرمین سینیٹ محمد صادق سنجرانی کا کہنا تھا کہ ‘اسٹریٹجک تعاون شراکت داری’ پاک اور  چین تعلقات کو نئی بلندیوں پر لے جائے گی۔

انہوں نے کہا کہ دونوں حقیقی دوست  ہر طرح کے حالات میں ایک دوسرے کے ساتھ کھڑے رہے، پاکستان چین کے قومی مفاد کے بنیادی امور’’ ون چائنا پالیسی ‘‘، تائیوان ، تبت ، ہانگ کانگ اور بحیرہ جنوبی چین پر چین کی حمایت کرتا ہے۔

محمد صادق سنجرانی کا کہنا تھا کہ پاکستان پاک -چین اقتصادی راہداری منصوبے کی بروقت تکمیل کے لیے پرعزم ہے، اقتصادی راہدای کے مخالف عناصر کامیاب نہیں ہوں گے۔

انہوں نے کہا کہ حکومت  پاکستان میں چینی شہریوں کی حفاظت کیلئے تمام اقدامات کررہی ہے۔

دوسری جانب چین کے سفیر نونگ رونگ کا کہنا تھا کہ پاکستان چین کا قریبی دوست ہے ، چین دوطرفہ تعاون مزید مستحکم کرنے کا خواہاں ہے۔

 نونگ رونگ کا مزید کہنا تھا کہ چین کے تجربات پاکستان کی سماجی اور معاشی خوشحالی میں معاون ثابت ہوں گے۔