اسپیکر پنجاب اسمبلی محمد سبطین خان کا کہنا ہے کہ پی ٹی آئی کی کامیابی عوام کے دلوں میں عمران خان کی مقبولیت کا منہ بولتا ثبوت ہے۔

اسپیکر محمد سبطین خان سے سابق وزیر اعلیٰ پنجاب میاں منظور احمد خاں وٹو نے اسپیکر چیمبر میں ملاقات کی جس میں موجودہ سیاسی صورتحال سمیت دیگر دلچسپی کے امور پر تبادلہ خیال ہوا۔

ملاقات میں میاں منظور احمد خاں وٹو نے محمد سبطین خان کو اسپیکر پنجاب اسمبلی منتخب ہونے پر مبارکباد بھی دی۔

سبطین خان نے ملاقات کے دوران گفتگو کرتے ہوئے کہا کہ پنجاب میں پی ٹی آئی کی شاندار کامیابی عوام کے دلوں میں عمران خان کی مقبولیت کا منہ بولتا ثبوت ہے۔

اسپیکر پنجاب اسمبلی نے مزید کہا کہ عوام باشعور ہیں، لاہور کے عوام نے بھی مسلم لیگ ن کو مسترد کرکے عمران خان کے بیانئے کو تقویت دی ہے۔

واضح رہے کہ سابق ایم این اے میاںخرم جہانگیر خان وٹو، سابق رکن پنجاب اسمبلی میاں معظم جہانزیب خان وٹو، اور سیکرٹری اسمبلی عنایت اللہ لک بھی ملاقات میں موجود تھے۔