وزیر اعلیٰ بلوچستان نے کہا ہے کہ دشمن کی ہر سازش کو عوام کی حمایت سے ناکام بنائیں گے۔

تفصیلات کے مطابق وزیر اعلیٰ بلوچستان عبدالقدوس بزنجو سے آئی جی پولیس عبدالخالق شیخ کی ملاقات ہوئی جس میں وزیر اعلیٰ کو آئی جی پولیس کی جانب سے سکیورٹی امور سے متعلق بریفنگ دی گئی۔

آئی جی پولیس عبدالخالق شیخ نے کہا کہ وزیر اعلیٰ کی ہدایت کے مطابق کوئٹہ سمیت صوبہ بھر  میں سیکیورٹی اقدامات کو مزید موثر بنایا گیا ہے اور  شہر کے سیکورٹی پلان کا از سر نو جائزہ لیکر مزید بہتر کیا جارہا ہے۔

‘دہشتگرد لوگوں کو ٹارگٹ کر کے اپنے مقاصد پورے کرنا چاہتے ہیں’

اجلاس کی صدارت کرتے ہوئے وزیر اعلیٰ بلوچستان عبدالقدوس بزنجو نے کہا کہ ملک دشمن عناصر یوم آزادی کے موقع پر دہشت گردی کے ذریعہ اپنی موجودگی ثابت کرنا چاہتے ہیں جبکہ دہشت گرد عناصر معصوم غریب اور بے گناہ لوگوں کو ٹارگٹ کر کے اپنے مزموم مقاصد پورے کرنا چاہتے ہیں۔

وزیر اعلیٰ بلوچستان نے کہا کہ ہماری سیکورٹی فورسز ملک دشمن عناصر سے نمٹنے کی بھرپور صلاحیت رکھتی ہیں، دشمن کی ہر سازش کو عوام کی حمایت سے ناکام بنائیں گے۔

عبدالقدوس بزنجو نے آئی جی پولیس کو ہدایت کی کہ دہشت گردوں سے آہنی ہاتھوں سے نمٹا جائے۔

‘بلوچستان کے عوام کا جزبہ حب الو طنی ناقابل شکست ہے’

وزیر اعلیٰ بلوچستان عبدالقدوس بزنجو نے مزید کہا کہ عوام صوبہ بھر میں یوم آزادی کی تقریبات بھرپور طریقے سے منانے کے لیۓ تیار ہیں، بلوچستان کے عوام کا جزبہ حب الو طنی ناقابل شکست ہے۔

قائم مقام گورنر جان محمد جمالی اور پارلیمانی سیکرٹری اقلیتی امور خلیل جارج بھی ملاقات میں موجود تھے۔