اسپیکر پنجاب اسمبلی محمد سبطین خان نے کہا ہے کہ پرویز الٰہی بلا تفریق صوبے کے عوام کی خدمت کریں گے۔

تفصیلات کے مطابق اسپیکر پنجاب اسمبلی محمد سبطین خان سے آسٹریلین ہائی کمشنرنیل ہاکنز نے اسمبلی چیمبر میں ملاقات کی جس میں اسپیکر نے نیل ہاکنز کی پاکستان میں بطور ہائی کمشنرتقرری کا خیر مقدم کیا۔

    اسپیکر پنجاب اسمبلی محمد سبطین خان نے کہا کہ پی ٹی آئی اور اتحادی جماعت پاکستان مسلم لیگ عوامی مسائل کے حل پر بھر پور توجہ دے رہے ہیں، وزیرِ اعلیٰ پنجاب چوہدری پرویز الٰہی تجربہ کار رہنما ہیں، وہ بلا تفریق صوبے کے عوام کی خدمت کریں گے۔

  سبطین خان نے کہا کہ پاکستان کی قومی اور صوبائی اسمبلیوں میں خواتین اور اقلیتی برادری کے لیے نشستیں مخصوص کی گئی ہیں، خواتین اور اقلیتیں جنرل سیٹوں پر بھی الیکشن لڑ سکتے ہیں۔

انہوں نے کہا کہ اسٹینڈنگ کمیٹیاں مکمل طور پر فعال ہونی چاہیں، اس کے لیے ہوم ورک شروع کر رہے ہیں، برطانیہ اور دیگر ممالک کی اسمبلیاں وزٹ کرنے کا بھی موقع ملا ہے، پنجاب اسمبلی میں مزید بہتری لائیں گے۔

 اسپیکر پنجاب اسمبلی نے کہا کہ پنجاب اسمبلی نے زیرو آور شروع کیا جو کہ پاکستانی پارلیمانی تاریخ میں نیا ٹول تھا، پی ٹی آئی نے چیئرمین عمران خان کی سربراہی میں جمہوریت کے فروغ کے لیے بے مثال جدوجہد کی۔

ملاقات میں آسٹریلوی ہائی کمشنر نے محمد سبطین خان کو پنجاب اسمبلی کا اسپیکر بننے پر مبارکباد دی اور کہا کہ پنجاب اسمبلی کی نئی عمارت ماسٹر پیس آف آرٹ ہے۔