سندھ ہائی کورٹ میں حاجی مرید گوٹھ گل بہارمیں گھروں کے سامنے کچراکنڈی کے قیام کیخلاف درخواست پرسماعت ہوئی۔

درخواست پرسماعت کے دوران درخواست گزارسے گھرکے مکمل دستاویزات طلب کرتے یوئے جسٹس سید حسن اظہررضوی نے ریمارکس دیے کہ کچرا اٹھانا اداروں کی ذمہ داری ہے مگر آپ کو دستاویزات پیش کرنا ہوں گی۔ شہرسے کچرا اٹھانا چاہیے۔

عدالت نے کہا کہ گیس، بجلی، پانی اور دیگر دستاویزات پیش کریں پھر حکم نامہ جاری کریں گے۔

وکیل درخواست گزار نے مؤقف اپنایا کہ درخواست گزار کے گھر کے قریب کچرا کنڈی بنا دی گئی ہے۔ وزیراعظم پورٹل ایپلیکیشن پر بھی متعدد بار شکایت کی۔

درخواست گزار کے وکیل نے عدالت کو بتایا کہ کچرا اٹھاتے وقت پانی، گیس اور بجلی کی لائنیں متاثر ہوتی ہیں۔ متعلقہ اداروں کو کچرا کنڈی منتقل کرنے کا حکم دیا جائے۔

دوسری جانب سندھ ہائی کورٹ میں سائیٹ ایریا میں گرین بیلٹ، فٹ پاتھ پر تعمیرات کے خلاف درخواست کی بھی سماعت ہوئی۔

عدالت نے پلاٹ پرتعمیرات فوری روکنے کا حکم دیتے ہوئے پلاٹ کا جائزہ لینے کے لیے ناظر سندھ ہائی کورٹ مقرر کردیا۔

سندھ ہائی کورٹ نے سائیٹ ایسوسی ایشن اور دیگر حکام کو نوٹسز بھی جاری کرتے ہوئے حکم دیا کہ ناظرمذکورہ پلاٹ کا جائزہ لے اور رپورٹ پیش کرے۔

عدالت نے پولیس کو معائنے کے دوران امن و امان کی صورتحال پر قابو پانے کی ہدایت بھی کی۔

واضح رہے کہ امریلی اسٹیل نے غیر قانونی تعمیرات کے خلاف عدالت سے رجوع کیا تھا جس میں مؤقف پیش کیا گیا کہ ڈی ٹو 95 پلاٹ نمبر کہیں موجود ہی نہیں۔ 100 فٹ روڑ پر گرین بیلٹ پر تعمیرات کی گئی۔

درخواست میں یہ بھی کہا گیا کہ گرین بیلٹ پرایک نیا پلاٹ نکال کر تعمیرات کی جا رہی ہیں۔