لاہورہائی کورٹ نے آئی جی پنجاب پولیس کو توہین عدالت کا شوکاز نوٹس جاری کر دیا۔ 

تفصیلات کے مطابق لاہور ہائی کورٹ میں جسٹس شاہد وحید نے شہری محمد نواز ملک کی درخواست کی سماعت کرتے ہوئے آئی جی پنجاب فیصل شاہکار کو شوکاز نوٹس جاری کرتے ہوئے 4 اکتوبر کو وضاحت سمیت طلب کرلیا۔

شہری کی جانب سے درخواست میں مؤقف اپنایا گیا کہ پولیس افسران کو سیکیورٹی فراہم کرنے کی درخواستیں دیں اور شنوائی نہ ہونے پر ہائی کورٹ سے رجوع کیا۔ عدالت نے 24 دستمبر 2021 کو آئی جی کو زیرالتوا درخواست پر فیصلے کا حکم دیا۔

درخواست میں مؤقف اپنایا گیا کہ عدالتی حکم کے باوجود آئی جی پنجاب نے سیکیورٹی فراہم کرنے کی زیرالتوا درخواست پرکوئی فیصلہ نہیں کیا۔ ۔

شہری نے درخواست میں استدعا کی کہ حکم عدولی پر آئی جی پنجاب کےخلاف توہین عدالت کی کارروائی کی جائے۔

عدالتی استفسار پرلاء افسر عدالتی حکم پرعمل درآمد کے متعلق تسلی بخش جواب نہ دے سکا۔

9 خواتین اور بچے رہا 

دوسری جانب لاہورہائی کورٹ میں بھٹہ مزدوروں کی بازیابی سے متعلق کیس کی بھی سماعت ہوئی۔

عدالت نے حبس بے جا میں رکھی گئیں 9 خواتین اور بچے رہا کر دیے، رہا ہونےوالوں میں3 خواتین اور6 کم سن بچے شامل ہیں۔

جسٹس محمد وحید خان نےفیض اللہ کی درخواست پر سماعت کی۔

عدالتی حکم پر پولیس نے محبوس افراد کو عدالت پیش کیا اور درخواست گزار نے مؤقف پیش کیا کہ اسلم صدیقی اینٹوں کے بھٹے پرجبری مشقت لے رہا ہے۔ استدعا ہے کہ مبحوس مزدوروں کو بازیاب کروا کر آزاد کیا جائے۔

وکیل بھٹہ مالک نے کہا کہ جبری مشقت لینے کا الزام درست نہیں۔ بھٹہ مزدوروں نےایڈوانس رقم لےرکھی ہے۔