روس نے خبردار کیا ہے کہ یوکرین کی نیٹو میں شمولیت تیسری عالمی جنگ کا باعث بن سکتی ہے۔

بین الاقوامی خبر رساں ادارے کے مطابق روسی فیڈریشن کی سلامتی کونسل کے ڈپٹی سیکرٹری الیگزینڈر وینڈیکٹوف نے  سرکاری خبر رساں ایجنسی  کو انٹرویو دیتے ہوئے کہا کہ یوکرین کو نیٹو میں شامل کرنے کے نتیجے میں تیسری عالمی جنگ چھڑ سکتی ہے۔

30 ستمبر کو روسی صدر ولادی میر پوٹن کی جانب سے یوکرین کے 18 فیصد  حصے کے الحاق کے باضابطہ اعلان کے چند گھنٹے بعد ہی یوکرین کے صدر ولادی میر زیلنسکی نے اعلان کیا کہ یوکرین کے لیے نیٹو اتحاد میں شمولیت کا عمل تیز کیا جائے۔

یوکرین کو نارتھ اٹلانٹک ٹریٹی آرگنائزیشن (نیٹو) کی مکمل رکنیت حاصل کرنا آسان نہیں ہوگا کیوں کہ اس کے لیے اس اتحاد میں شامل تمام 30 ممالک کی رضامندی درکار ہوگی۔

لیگزینڈر وینڈیکٹوف نے کہا کہ یوکرین یہ بات بخوبی جانتا ہے کہ اس طرح کے اقدامات کے نتیجے میں تیسری عالمی جنگ کا آغاز ہوسکتا ہے۔

انہوں نے کہا کہ یوکرین کی نیٹو میں شمولیت ایک پراپیگنڈہ کے علاوہ کچھ نہیں ہے کیوں کہ مغرب یوکرین کے نیٹو میں شمولیت کے نتائج سے بخوبی واقف ہے جب کہ اس طرح کے اقدامات کے خطرناک نتائج سے نیٹو کے تمام ممالک آگاہ ہیں۔