حافظ نعیم الرحمٰن نے کہا ہے کہ جماعت اسلامی کراچی کے نوجوانوں کے لیے جدوجہد کررہی ہے۔

تفصیلات کے مطابق امیر جماعت اسلامی کراچی حافظ نعیم الرحمٰن نے باغ جناح گراؤنڈ میں بنو قابل ٹیسٹ کے شرکاء سے خطاب کرتے ہوئے کہا کہ شہر کراچی اور پاکستان کے روشن مستقبل کے روشن ستارے یہاں موجود ہے۔

انہوں نے کہا کہ ایپٹی ٹیوٹ ٹیسٹ ملک میں سیلاب کے باعث ملتوی ہوا تھا لیکن اب ایپٹی ٹیوٹ ٹیسٹ میں پاس ہونے والوں کے لیے اسکالر شپ کا انتظام کریں گے۔

ان کا کہنا تھا کہ جماعت اسلامی کراچی کے نوجوانوں کے لیے جدوجہد کررہی ہے، ہم الخدمت کے تحت نوجوانوں کو پڑھائیں گے اور نوجوان اپنے والدین کا سہارا بنیں گے۔

حافظ نعیم الرحمٰن نے کہا کہ کراچی میں 30 سال تک نوجوانوں کی تعداد 2 کروڑ ہے جبکہ 10 لاکھ بچے ایسے ہیں جو اسکول ہی نہیں جا رہے اور میٹرک پاس کرنے کے بعد ڈھائی لاکھ ایسے ہیں جو آگے نہیں پڑھ پاتے۔

انہوں نے کہا کہ تین کروڑ سے زائد نوجوانوں کے لیے صرف 2 جنرل یونیورسٹیاں ہیں جبکہ جماعت اسلامی کراچی کے نوجوانوں کے لیے یونیورسٹیاں بنوائے گی۔

ان کا کہنا تھا کہ ہم کراچی میں پانی، بجلی اور تعلیم سمیت بنیادی ضروریات کے حصول کے لیے نوجوانوں کے لیے جدوجہد کررہے ہیں۔

ان کا یہ بھی کہنا تھا کہ آج کے والدین بچوں کو اسکول پہنچانے اور ماہانہ فیس ادا کرنے کے لیے پریشان ہیں جبکہ ساڑھے چار ہزار سرکاری اسکولز میں تعلیم کیوں نہیں ملتی ہے؟

امیر جماعت اسلامی کراچی نے کہا کہ جب بھی بلدیاتی انتخابات قریب آتے ہیں یہ لوگ ملتوی کر دیتے ہیں لیکن ہم ان کا تعاقب کریں گے اور ہر صورت میں انتخابات کروائیں گے۔

انہوں نے کہا کہ جماعت اسلامی کا مئیر ہر صورت آئے گا اور کراچی کے نوجوانوں کے لیے کام کرے گا، ہم اختیارات کا رونا نہیں روئیں گے جتنے اختیارات ہوں گے اس سے زیادہ کام کریں گے۔

ان کا کہنا تھا کہ کراچی کے ہر کاروباری طبقے کے پاس جاؤں گا اور فنڈز جمع کرکے نوجوانوں کو پڑھاؤں گا۔

ان کا یہ بھی کہنا تھا کہ ہم آئی ٹی پروگرام کے تحت نوجوانوں کو خود مختار کریں گے، کراچی میں آئی ٹی سٹی لیڈ بنائیں گے جبکہ ہم  کراچی نوجوانوں کو امیدوں اور یقین سے ہمکنار بھی کررہے ہیں۔

حافظ نعیم الرحمٰن نے کہا کہ نوجوانوں روزگار کے حصول کے لیے غلط کاموں میں مت پڑنا بلکہ محنت اور لگن سے ہمیشہ آگے بڑھنا۔

انہوں نے کہا کہ سابق سٹی ناظم نعمت اللہ خان کی کوشش سے 500 روپے ماہانہ سے ہزاروں گریجویٹ پاس کروائے جبکہ آئندہ 4 سال میں الخدمت مخلتف این جی اوز کے تحت دس لاکھ نوجوانوں کو آئی ٹی کورسز کروائیں گے اور ٹیکنالوجی ٹیسٹ بھی کروائیں گے، ٹیکنالوجی میں بھی نوجوانوں کو آگے بڑھائیں گے۔

ان کا کہنا تھا کہ نوجوانوں کے ساتھ مل کر کھیلوں کے میدانوں سے قبضے بھی چھڑوائیں گے۔

آخر میں امیر جماعت اسلامی کراچی حافظ نعیم الرحمٰن نے ٹیسٹ کے شرکاء سے پاکستان اور اسلامی نظریے سے وفاداری کا کھڑے ہو کر عہد بھی لیا۔