بھارت کے دارالحکومت دہلی اور اس کے گردونواح کے علاقوں میں دیوالی پر پٹاخے چلانے پر پابندی عائد کر دی گئی ہے۔

تفصیلات کے مطابق یہ پابندی بھارتی سپریم کورٹ کے حکم پر نافذ کی گئی ہے اور سپریم کورٹ نے پٹاخوں پر عائد پابندی کو ہٹانے سے انکار کردیا ہے، بھارتی سپریم کورٹ نے کہا کہ دیوالی کی چھٹیوں سے پہلے معاملہ کی سماعت کریں گے۔

بھارتی سپریم کورٹ نے کہا کہ ہم نے آلودگی کو لے کر دہلی این سی آر کیلئے خاص حکم جاری کئے تھے، ہمارا حکم بہت واضح ہے ۔ عدالت عظمی نے اس درخواست کو دیگر درخواستوں کے ساتھ منسلک کرنے کا حکم دیا ہے ۔

بھارتی میڈیا کے مطابق بی جے پی لیڈر منوج تیواری کے ذریعہ سپریم کورٹ میں دائر عرضی پر آج سپریم کورٹ میں سماعت ہوئی، جس میں سپریم کورٹ نے پٹاخوں پر لگائی گئی پابندی ہٹانے سے منع کردیا.

بی جے پی لیڈر منوج تیواڑی کی درخواست میں پٹاخوں پر عائد پابندی کو کلچر کے خلاف بتایا گیا تھا۔

منوج تیواڑی نے اپنی درخواست میں سپریم کورٹ کے اس فیصلہ کو چیلنج کیا تھا، جس میں کہا گیا تھا کہ اگلے سال دو جنوری تک دہلی میں مکمل طور پر پٹاخوں پر پابندی رہنے والی ہے۔ بی جے پی لیڈر منوج تیواری نے اپنی درخواست میں اس فیصلہ کو ہندو کلچر کے خلاف بتایا۔

آج ہونے والی سماعت میں جسٹس ایم آر شاہ کی بینچ نے واضح کردیا کہ وہ پٹاخوں پر عائد پابندی نہیں ہٹائیں گے، سماعت کے دوران عدالت نے کہا کہ دہلی این سی آر کو لے کر ہمارا فیصلہ پوری طرح واضح ہے۔

بھارتی سپریم کورٹ کے جسٹس ایم آر شاہ نے اپنے ریمارکس میں کہا کہ کیا آپ نے آلودگی کی صورتحال نہیں دیکھی، دہلی میں پہلے ہی آلودگی میں اضافہ ہونے لگا ہے ۔

عدالت نے کہا کہ آپ خود این سی آر میں رہتے ہیں، پھر پہلے سے بڑھی آلودگی کو اور زیادہ کیوں بڑھانا چاہتے ہیں، ہم اس پابندی کو ہٹا نہیں سکتے ہیں۔