اسپیکرسندھ اسمبلی آغا سراج درانی اور دیگر کی ذرضمانت کی رقم واپسی سے متعلق درخواست پرنیب کو نوٹس جاری۔

سندھ ہائی کورٹ میں آمدن سے زائد اثاثے بنانے کے ریفرنس میں اسپیکر سندھ اسمبلی آغا سراج درانی و دیگر کی ذر ضمانت کی رقم واپسی سے متعلق درخواست کی سماعت ہوئی۔

سندھ ہائی کورٹ نے درخواستوں پر نیب کو نوٹس جاری کرتے ہوئے درخواستوں کی مزید سماعت 8 نومبر تک ملتوی کردی۔

آغا سراج درانی و دیگر نے سندھ ہائی کورٹ سے ضمانت حاصل کرنے کے بعد ذر ضمانت جمع کرائی تھی۔ ملزمان کے خلاف احتساب عدالت میں ریفرنس زیر سماعت ہے۔

سندھ ہائی کورٹ کے اسپیشل بنچ نے آغا سراج درانی و دیگر کی ضمانت مسترد کردی تھی۔

دوسری جانب سندھ ہائی کورٹ میں کراچی کے پارکس اور چڑیا گھروں میں جنگلی جانوروں کی خستہ حالت سمیت شاہراہوں پر بندروں کا تماشہ دکھانے پر پابندی لگانے کی درخواست پربھی سماعت ہوئی۔

عدالت میں ردا طاہر کی درخواست پر محکمہ جنگلی حیات نے جواب جمع کرایا جس میں کہا گیا کہ شاہراہیں، پارکس اور چڑیا گھر  محکمہ بلدیات کے ماتحت ہیں۔ یونین کونسل سے میٹرو پولیٹن تک تمام پارکس اور چڑیا گھر کی اپنی انتظامیہ ہے۔ اس پر محکمہ جنگلی حیات کا کنٹرول نہیں ہے۔

محکمہ جنگلی حیات نے جواب میں کہا کہ چڑیا گھروں اور پارکس میں جنگلی جانوررکھنے کا لائسنس ہم جاری نہیں کرتے، عدالت جو حکم کرے گی اس پرعمل کیا جائے گا۔

درخواست میں کہا گیا کہ وائلڈ لائف قوانین تحت  وائلڈ لائف پولیس اسٹیشن قائم کیا جائے۔

بیرسٹر علی طاہرنے کہا کہ ان جانوروں کی بہترحالت کے لئے جنگلی حیات کے متعلق قانون پر سختی سے عمل درآمد کرانے کی اشد ضرورت ہے، متعلقہ حکام کو ہدایت کی جائے کہ چڑیا گھر میں رکھے گئے جانوروں کو ان کے ماحول کے مطابق  سہولیات فراہم کی جائیں۔ پارکس و چڑیا گھروں میں رکھے گئے جانورون کو کس کی اجازت سے رکھا گیا ہے تحقیقات کی جائے۔

عدالت نے دیگرفریقین سے جواب طلب کرتے ہوئے مزید سماعت 28 نومبرتک ملتوی کردی۔