وزیراعظم شہباز شریف سے فلسطین کے صدر محمود عباس کی ملاقات ہوئی ہے۔

ملاقات میں فلسطین کے صدر اور وزیراعظم شہبازشریف ایک دوسرے سے گرمجوشی سے بغل گیر ہوئے، صدر محمود عباس نے فرط جذبات سے وزیراعظم شہبازشریف کے دونوں ہاتھ اپنے ہاتھوں میں تھام لئے۔

محمود عباس اور شہبازشریف کے درمیان دلچسپ مکالمہ ہوا اور دونوں قائدین کے درمیان جذباتی گفتگو اسلامی اخوت اور بھائی چارے کی مثال بن گئی۔

اس موقع پر فلسطین کے صدر محمود عباس نے کہا کہ پاکستان ہمارا گھر ہے، پاکستانی ہمارے بھائی اور بہنیں ہیں جبکہ پاکستانی ہمارے گھر کے لوگ ہیں اور ہم نے اُن کے لئے کچھ بھی نہیں کیا ہے۔

وزیراعظم شہبازشریف کا کہنا تھا کہ ایسا نہ کہیں، فلسطین نے سیلاب زدگان کی جس طرح مدد کی وہ بھول نہیں سکتے، سیلاب کے دوران آپ کی مدد کے لئے بے حد شکرگزار ہوں، پاکستان کبھی فلسطینیوں کو بھول نہیں سکتا جبکہ آپ کی کامیابی تک پاکستان آپ کے حق کے لئے آواز بھی بلند کرتا رہے گا۔

  فلسطین کے صدر محمود عباس نے مزید کہا کہ ہم پاکستان کو کبھی بھی نہیں بھولتے، مفتی فلسطین اپنی وفات تک پاکستان میں رہے، ان کی دیکھ بھال بھی پاکستان نے کی جبکہ قیام پاکستان سے پہلے سے ہم پاکستانیوں کے ساتھ ہیں۔

وزیراعظم شہبازشریف نے کہا کہ فلسطین ہمارے دل میں ہے  اور ہمارے ایمان ویقین کا حصہ ہے۔

اس موقع پر وزیراعظم شہبازشریف نے مزید کہا کہ آج کی کانفرنس میں پاکستان کی حمایت کرنے والے راہنماﺅں میں آپ شامل ہیں اور میں آپ کی حمایت اور جذبے پر دل کی گہرائیوں سے شکریہ ادا کرتا ہوں۔