عدالت نے غیر قانونی تعمیرات کے خلاف کے ایم سی کو اینٹی انکروچمنٹ سیل کا فریق بنانے کی ہدایت جاری کردیں۔

تفصیلات کے مطابق سندھ ہائی کورٹ نے لانڈھی کے علاقے خرم آباد میں رفاعی پلاٹ پر قبضےکا نوٹس لیتے ہوئے کے ایم سی کواینٹی انکروچمنٹ سیل کو فریق بناکر اس کے خلاف ایکشن لینے کی ہدایت جاری کیں۔

جسٹس ندیم اختر نے ایس بی سی اے وکیل سے سوال کرتے ہوئے کہا کہ یہ قبضے کون ختم کرائے گا ؟ ایس بی سی اے کے جواب جمع کرانےکے بعد جسٹس ندیم اختر نے دوبارہ سوال کرتے ہوئے کہا کہ آپ کے جواب میں جواب کہاں ہے؟

عدالت کے ان سوالوں کا جواب دیتے ہوئےوکیل ایس بی سی اے عثمان فاروق نے کہا کہ اس میں اینٹی انکروچمنٹ ڈیپارٹمنٹ کی حدود بنتی ہے۔

عدالت کی جانب سے دوبارہ سوال کیا گیا کہ غیر قانونی تعمیرات پر کیا آپ کی حدود نہیں؟ اور کیا آپ کی جانب سے اینٹی انکروچمنٹ سیل کو فریق بنایا گیا؟

عدالت کے استفسار کےجواب میں ایڈووکیٹ عثمان فاروق نے استدعا کی کہ انھیں فریق بنانے کے لیے دس دن کی مہلت دے دی جائے۔