پمزکی پوسٹ مارٹم کی رپورٹ میں انکشاف ہوا ہے کہ ارشد شریف کوتین فٹ کے فاصلےسے نشانہ بنایا گیا۔ 

تفصیلات کے مطابق پمزپوسٹ مارٹم رپورٹ میں انکشاف ہوا ہے کہ معروف صحافی اور اینکرپرسن شہید ارشد شریف کوتین فٹ کے فاصلے نشانہ بنایا گیا۔ پہلی گولی گردن میں تین فٹ سے لگی۔

پمز اسپتال کی جانب سے پوسٹ مارٹم رپورٹ کے متن میں کہا گیا کہ انتہائی قریب سے نشانہ بنانے والی گولی نے جسم پر سیاہ نشان چھوڑا۔ دوسری گولی تین سے چھ فٹ کے فاصلے سے سر پہ لگی۔

پوسٹ مارٹم رپورٹ کے متن کے مطابق چارزخم مزاحمت کی نشاندہی کرتے ہیں۔ ہاتھ اور کلائی پرزخم مزاحمت کی علامت ہیں۔

رپورٹ میں یہ بھی کہا گیا کہ مجوعی طورپرلاش پربارہ زخم کے نشانات ہیں۔ پانچ زخم پہلے پوسٹ مارٹم کی وجہ سے سامنے آئے۔ رپورٹ میں لاش پرتشدد اورجسم کی ہڈیاں ٹوٹنے کا ذکر نہیں ہے۔

فیکٹ فائنڈنگ کمیٹی میں فیصل واوڈا اور مراد سعید کی طلبی

دوسری جانب ذرائع کے مطابق ارشد شریف کیس کے معاملے میں فیکٹ فائنڈنگ کمیٹی نے فیصل واوڈا اور مراد سعید کو طلب کرلیا۔

ایف آئی اے ذرائع کا کہنا ہے کہ فیصل واوڈا اور مراد سعید نے دعویٰ کیا تھا کہ وہ ارشد شریف کو لاحق خطرات سے آگاہ تھے۔ فیصل واوڈا اور مراد سعید کو فیکٹ فائنڈنگ کمیٹی نے پیر کو ایف آئی اے ہیڈ کوارٹرز طلب کیا ہے۔

ذرائع کا یہ بھی کہنا ہے کہ دونوں رہنماؤں کو شواہد کے ساتھ ایف آئی اے ہیڈ کوارٹر آنے کے لیے نوٹس بھیجےگئے۔