صدر مملکت نے کہا ہے کہ آئین کی پاسداری، قوانین کا منصفانہ، غیر جانبدارانہ اور منصفانہ اطلاق ضروری ہے۔

تفصیلات کے مطابق صدر مملکت ڈاکٹر عارف علوی سے پاکستان انسٹی ٹیوٹ آف پیس سٹڈیز کے وفد کی ملاقات ہوئی جس میں صدر مملکت نے ہندوستان میں اسلامو فوبیا، مذہبی تعصب، اور اقلیتوں کو ڈرانے اور تشدد کے بڑھتے ہوئے رجحان پر تشویش کا اظہار کیا۔

اس موقع  پر صدر مملکت نے کہا کہ دنیا میں جامع قیام ِامن کیلئے اخلاقیات اور انسانیت پر مبنی عالمی نظام کو اپنایا جانا چاہیے، دنیا بھر کے معاشرے طاقت کا استعمال ختم کرنے کیلئے کوششیں کر رہے ہیں۔

ڈاکٹر عارف علوی نے تمام اقوام اور لوگوں پر بلا امتیاز ، یکساں اور منصفانہ طور پر بین الاقوامی قوانین کے  اطلاق کی ضرورت پر زور دیا۔

انہوں نے کہا کہ باہمی یقینی تباہی ، مہذب اور رحمانہ جنگ کے تصورات کو مسترد کرکے ہی مکمل عالمی امن کا حصول ممکن ہے جبکہ یہ تصورات طاقت کے عناصر ہیں اور انصاف کے اصولوں کے خلاف ہیں۔

 صدر مملکت ڈاکٹر عارف علوی نے مزید کہا کہ آئین کی پاسداری، قوانین کا منصفانہ، غیر جانبدارانہ اور منصفانہ اطلاق ضروری ہے ، ذاتی مفادات، تعصبات یا فوبیا زکے بجائے وسیع تر عوامی مفاد کو مدنظر رکھتے ہوئے قوانین بنائے جائیں۔