شہر قائد میں جرائم کا جن بے قابو ہوگیا ہے، شہر کے باسی ڈاکوؤں کے رحم و کرم پر ہیں۔

حکومت کی نااہلیاں، معاشی بحران، مہنگائی، بیروزگاری، غربت وجہ کچھ بھی ہو، تین کروڑ سے زائد آبادی والا شہر کراچی اسٹریٹ کرائمز کا گڑھ بن گیا ہے۔

روزو شب ہر جانب ڈاکو راج نے عوام کوخوف و ہراس میں جکڑا ہوا ہے، پولیس لگام ڈالنے میں بری طرح ناکام ہے۔

شہر بھر میں تواتر سے رونما ہونے والی ریکارڈ توڑ وارداتوں نے پولیس حکام کے امن و امان کے راگ الاپنے کی قلعی کھول دی ہے۔

اسٹریٹ کرائم کی وارداتوں میں ریکارڈ اضافے کے حوالے سے پلس کنسلٹنٹ نے کراچی کے ساتوں اضلاع کے ایک ہزار سے زائد شہریوں کی رائے پر مبنی سروے جاری کیا، جس میں کراچی میں 69 فیصد شہریوں کے اسٹریٹ کرائم کا نشانہ بننے کا انکشاف ہوا ہے۔

سروے کے مطابق اسٹریٹ کرائم کا نشانہ بننے والوں میں ہر 10 میں سے 7 افراد نے اپنے پڑوسیوں کے اسٹریٹ کرائمز کا شکار ہونے کا بتایا، 63فیصد نے کسی آفس کے ساتھی جبکہ 23 فیصد نے خود اسٹریٹ کرمنلز کے ہاتھوں لٹنے کا انکشاف کیا۔

کراچی میں پولیس کی اسٹریٹ کرائم اور ڈکیتیوں پر قابو پانے کی ہرحکمت عملی مکمل طور پر ناکام ہوگئی ہے۔

اسٹریٹ کرائم کے لئے قانون میں سخت سزا ہونی چاہیے،اسٹریٹ کرائم آسان جرم ہے،سزا نہ ہونے کی وجہ سے ملزم فائدہ اٹھا رہے ہیں۔